Sog‘lini saqlash vazirligining xabar berishicha, Nukus shahrida ilk bor bronxospazmni yuzaga keltirish orqali tekshirish usuli yo‘lga qo‘yildi.

Respublika ilmiy ixtisoslashtirilgan allergologiya markazi direktori Ilmira Razikovaning qayd etishicha, dunyoda allergik kasalliklarning o‘ta og‘ir kechuvchi yangi turlari ko‘paymoqda. Bu ekologik muammolar, noto‘g‘ri ovqatlanish, dori vositalarini haddan tashqari ko‘p qabul qilish, kam harakatlik kabi qator omillar bilan bog‘liq.

Respublika ilmiy ixtisoslashtirilgan allergologiya markazi ana shunday xastaliklarni profilaktika va diagnostika qilish hamda davolashga ixtisoslashtirilgan. Bemorlar uchun 45 o‘rinli statsionar, konsultativ tashxis qo‘yish poliklinikasi, allergologiya, laboratoriya, fizioterapiya bo‘limlari, “astma va allergiya maktabi” faoliyat ko‘rsatmoqda.

O‘tgan yili qonda bir vaqtning o‘zida 90 turdagi allergenga nisbatan maxsus va umumiy immunoglobulinlarni aniqlash imkonini beruvchi “Protia Allergy-Q90” – IFA multipleks diagnostik tekshiruv usulini yo‘lga qo‘yildi. Teridan olingan materiallardan “Demodex folliculonum” va qo‘tir tanachalarini aniqlash usullari joriy qilingan.

Bundan tashqari, Italiyada ishlab chiqarilgan “Alisei” diagnostika avtomat analizatoridan foydalanilmoqda. U orqali eng ilg‘or deb hisoblangan “in vitro” usulida bir paytning o‘zida 200 dan ortiq allergenlarni aniqlash imkoniyati mavjud.

Zamonaviy diagnostika va davolash usullari hududlarda ham amaliyotga keng tatbiq etilmoqda.

Xususan, Nukus shahrida atopik sindromni erta aniqlash, tashxislash usullarini joriy etish loyihasi ro‘yobga chiqarilib, “Allergiya va astma” maktablari tashkil qilingan.

Shuningdek, markazning Qoraqalpog‘iston Respublikasi filiali va Nukus shahri ko‘p tarmoqli markaziy poliklinikasida ilk bor tashqi nafas tizimiga allergenlar ta’sirini provakatsiya, ya’ni allergenlar yuborilganda bronxospazmni yuzaga keltirish orqali tekshirish usuli yo‘lga qo‘yilgan.

Bronxial spazm bu bronxlar silliq mushaklarining nazoratsiz qisqarishi bo'lib, u insonning hayotiga tahdid soladi. Spazm paytida kichik bronxlar va bronxiolalar torayadi, bu kislorod oqimini, shuningdek, tanadan karbonat angidridni chiqarib tashlash jarayonini qiyinlashtiradi. Odam nafas olishda muammolarga duch keladi.

• Kasallik
• SSV