Yevropalik iqlimshunoslar o‘tgan yoz natijalarini sarhisob qilishdi. Kopernik nomidagi iqlim o‘zgarishi xizmati ma’lumotlariga ko‘ra, o‘tgan yoz fasli rekord darajadagi eng issiq yoz bo'ldi, qit’a asrlar davomidagi eng kuchli jazirama va qurg‘oqchilikdan aziyat chekdi.

2022-yil yozi 2021-yil avgustida o‘rnatilgan avvalgi rekordni katta farq bilan ortda qoldirdi. Farq selsiy bo‘yicha 0,4 darajani tashkil etadi.

2022-yilning iyunidan avgustigacha bo‘lgan harorat 1991 yildan 2020 yilgacha bo‘lgan davrdagi o‘rtacha ko‘rsatkichdan 1,34 darajaga yuqori bo‘lgan. Avgustning o‘zi o‘rtacha ko'rsatkichdan 1,74 daraja issiq bo‘lgan.

Shuningdek, 2022-yil o‘rmon yong‘inlari soni bo‘yicha rekord bo‘lgani xabar qilingan. Yanvar oyidan beri Yevropada deyarli 660 ming gektar o‘rmon yonib ketgan. Fransiyadagi yongʻinlar natijasida havo ifloslanishining eng yuqori darajasi muntazam kuzatuvlar boshlanganidan beri qayd etilgan.

Dunyo miqyosida 2022-yil avgusti ham tarixdagi eng issiq deb tan olingan. Monitoring maʼlumotlariga koʻra, oʻrtacha harorat 1991-2020-yillardagi oʻrtacha koʻrsatkichdan 0,3 darajaga yuqori boʻlgan.

• Yevropa
• Yoz fasli
• qiziqarli