Afg‘onistonning Balx viloyatida O‘zbekiston tomonidan moliyaviy qo‘llab-quvvatlanayotgan madrasa qurilishi boshlandi.

Ma’lum bo‘lishicha, madrasa 60 sotix maydonda joylashadi va u yerda 1000 nafar talabaga diniy ta’lim beriladi. Shu yilning 21-avgust kuni bo‘lib o‘tgan qurilishni boshlash marosimida Balx viloyati gubernatori o‘rinbosari Nurul-Xodiy Abu Idris va O‘zbekistonning Afg‘onistondagi Bosh konsuli Farhod Nazarov ishtirok etdi.  

Bosh konsulning ma’lum qilishicha, madrasa qurilishiga 6 million dollar sarflanadi.

“Bu diniy maktab Balx hokimining iltimosiga binoan qurilmoqda. Biz bu loyihaga bir yil vaqt ajratdik, shu vaqtgacha u tugallanadi”, – degan Farhod Nazarov.

Eslatib o‘tamiz, madrasaning qurilishi O‘zbekiston Tashqi ishlar vazirligi rahbari Baxtiyor Saidov va “Tolibon” yetakchilari o‘rtasida joriy yilning 12-13-mart kunlari bo‘lib o‘tgan muzokaralar doirasida kelishib olingan edi.

• Afg‘oniston
• madrasa