O‘zbekiston Prezidenti Shavkat Mirziyoyevning joriy yilda o‘nga yaqin Yevropa davlatlariga tashrifi kutilmoqda. Bu haqda 2022–2026-yillarga mo‘ljallangan taraqqiyot strategiyasini 2022-yilda amalga oshirish bo‘yicha “Yo‘l xaritasi” loyihasida so‘z boradi.

Qayd etilishicha, joriy yilda O‘zbekistonning tashqi aloqalari geografiyasini kengaytirishga ustuvor ahamiyat qaratiladi va iqtisodiy diplomatiya kuchaytiriladi.

2022-yil davomida Oliy darajadagi tashriflar orqali Yevropa mamlakatlari bilan hamkorlik aloqalari kengaytiriladi. Jumladan, Belgiya, Buyuk Britaniya, Vengriya, Italiya, Ispaniya, Turkiya, Shveysariya, Chexiya, Polsha va Skandinaviya mamlakatlariga oliy darajadagi tashriflar ishlab chiqiladi.

O‘z vaqtida Yevropa davlatlari va hukumatlarining rahbarlari hamda Yevropa Ittifoqi rahbariyatining O‘zbekistonga tashriflari borasida amaliy ishlar olib boriladi.

Mazkur hujjat loyihasida, shuningdek, O‘zbekistonning Shvetsiyada Elchixonasini ochish jarayonini tezlashtirish, Chexiyada diplomatik vakolatxona ochish masalasini ishlab chiqish hamda Yevropa mamlakatlaridagi (Avstriya, Italiya, Polsha va Latviya) bir qator diplomatik vakolatxonalarining moddiy-texnik bazasini, jumladan, xodimlar salohiyatini qo‘shimcha shtat birliklarini ajratish orqali mustahkamlash ishlari ham rejalashtirilmoqda.

• Mirziyoyev
• Prezident
• Tashrif