Qirg‘iziston Vazirlar Mahkamasi raisi Odilbek Qosimaliyev, O‘zbekiston bosh vaziri Abdulla Aripov va Tojikiston bosh vaziri Qohir Rasulzodaning uch tomonlama uchrashuvi bo‘lib o‘tdi.

Qirg‘iziston Vazirlar Mahkamasi matbuot xizmatining xabar berishicha, uchrashuv uch mamlakat chegaralari tutashgan joyda – Qirg‘izistonning Batken viloyati, O‘zbekistonning Farg‘ona viloyati va Tojikistonning So‘g‘d viloyatida bo‘lib o‘tgan.

Tomonlar uchrashuv uch mamlakat davlat rahbarlari o‘rtasida davlat chegaralari masalalari bo‘yicha ilgari erishilgan kelishuvlar doirasida o‘tkazilayotganini ta’kidlagan.

Qirg‘iziston, Tojikiston va O‘zbekiston bosh vazirlari mamlakatlar savdo, logistika, suv-energetika va madaniy-gumanitar aloqalar kabi yo‘nalishlarda hamkorlikni kuchaytirish salohiyatiga ega ekanini ma’lum qilgan. Ularning fikriga ko‘ra, hamkorlikning muhim tarkibiy qismi, chegara va mintaqalararo hamkorlikni rivojlantirishdir.

Bundan tashqari, uchrashuvda Qirg‘iziston va O‘zbekiston o‘rtasidagi davlat chegarasini delimitatsiya qilish jarayoni yakunlangani hamda “Qirg‘iziston-O‘zbekiston davlat chegarasi to‘g‘risida”gi bitimga ratifikatsiya yorliqlari almashilgani qayd etilgan.

• Bosh vazir
• Hukumat
• O‘zbekiston
• Qirg‘iziston
• Tojikiston