O‘zbekiston Respublikasi Prezidenti Shavkat Mirziyoyev 15-may kuni Turkiya Respublikasi vitse-prezidenti Jevdet Yilmaz boshchiligidagi delegatsiyani qabul qildi.

Uchrashuv avvalida martabali mehmon davlatimiz rahbariga Turkiya Prezidenti Rajab Toyyib Erdo‘g‘onning samimiy salomi va iliq tilaklarini yetkazdi.

O‘zbekiston-Turkiya o‘rtasidagi har tomonlama strategik sheriklik munosabatlarini, birinchi navbatda, savdo-iqtisodiy va sarmoyaviy sohalarda yanada kengaytirish va chuqurlashtirish masalalari muhokama qilindi.

Turli darajadagi davom etayotgan intensiv aloqalar va almashinuvlar chuqur mamnuniyat bilan qayd etildi. O‘zaro tovar ayirboshlash va sarmoya hajmi ortib, qo‘shma korxonalar soni, parvozlar chastotasi ortib bormoqda.

Bugun Toshkentda bo‘lib o‘tgan Hukumatlararo komissiyaning navbatdagi majlisi, biznes muloqoti va ko‘rgazmaning samarali natijalari yuqori baholandi.

Tovar ayirboshlash hajmini yanada oshirish, jumladan, Imtiyozli savdo bitimi doirasida tovarlar turini kengaytirish bo‘yicha kelishilgan chora-tadbirlarni ko‘rish muhimligi ta’kidlandi.

Innovatsiyalar, energetika, sanoat, farmatsevtika, to‘qimachilik, turizm, ta’lim va boshqa sohalarda qo‘shma loyihalarni ilgari surish, hamkorlik loyihalari va madaniy-gumanitar almashinuv dasturining yangi portfelini shakllantirish zarurligi qayd etildi.

Oliy darajadagi strategik hamkorlik kengashining navbatdagi majlisi kun tartibini tayyorlashga alohida e’tibor qaratildi.

• O‘zbekiston
• Turkiya