Joriy yilning 3-dekabr kuni O‘zbekiston Oliy Majlisi Qonunchilik palatasida bo‘lib o‘tgan majlisida “O‘zbekiston Respublikasining Soliq kodeksiga o‘zgartirish va qo‘shimchalar kiritish to‘g‘risida”gi qonun loyihasi muhokama qilindi. Bu haqida quyi palata matbuot xizmati xabar berdi.
Qayd etilishicha, taklif etilayotgan loyihada foyda solig‘ini hisoblab chiqarishda chegirmalarga kiritiladigan amortizasiya ajratmalari normalarini o‘rtacha 2 baravarga oshirish, bir martalik investisiyaviy chegirma miqdorlarini, binolar bo‘yicha — 10 foiz, yangi texnologik asbob-uskuna bo‘yicha — 20 foiz belgilangan holda 2 baravarga oshirish nazarda tutilmoqda.
Ta’kidlanishicha, ko‘chmas mulk joylashgan joyidan kelib chiqib bir kvadrat metr uchun minimal qiymat joriy etish bilan birga yuridik shaxslarning mol-mulk solig‘i stavkalarini pasaytirish ko‘zda tutilgan. Shuningdek, polietilen granulalariga aksiz solig‘i stavkasini 20 dan 10 foizgacha pasaytirgan holda, ushbu stavkani uning importiga ham joriy etish belgilanmoqda.
Bundan tashqari, yer solig‘i, suv resurslaridan foydalanganlik uchun esa soliq va aksiz solig‘i stavkalari o‘rtacha 10 foizga indeksasiya qilish nazarda tutilyapti. Bunda, qishloq xo‘jalik yerlarini sug‘orish uchun foydalanilgan suv hajmi qismi va baliqlarni o‘stirish (yetishtirish), shu jumladan, dehqon xo‘jaliklari uchun belgilangan suv resurslaridan foydalanganlik uchun soliq stavkalari 2021 yil darajasida (1 kub metr uchun 40 so‘m) saqlab qolinmoqda.
Shu bilan birga, loyihada soliq solish bilan bog‘liq bo‘lgan ob’yektlar hisobini tashkil etish, xususan, soliq imtiyozlari hisobi bo‘yicha yagona avtomatlashtirilgan tizimni yaratish, soliq to‘lovchining hisob ma’lumotlaridagi o‘zgarishlarni shaxsiy kabinet orqali tasdiqlash masalasi ham aks etgan.
Majlisda deputatlar tomonidan loyihani yanada takomillashtirish bo‘yicha berilgan takliflar inobatga olingan holda, qonun loyihasi qabul qilingan.

• Soliq
• Suv
• qishloq_xo‘jaligi