Shavkat Mirziyoyev «O‘zbekiston Respublikasining fan va texnika, adabiyot, san’at va me’morchilik sohasidagi davlat mukofotlarini berish to‘g‘risida»gi farmonni imzoladi. Bu haqda Prezident matbuot xizmati xabar berdi.

Farmonga ko‘ra, mamlakat ilm-fani, adabiyoti va san’atini rivojlantirishga qo‘shgan salmoqli hissasi, jamiyatning ijtimoiy-iqtisodiy, ilmiy-texnik va ma’naviy-ma’rifiy hayotida alohida e’tiborga sazovor bo‘lgan, xalqaro miqyosda e’tirof etilgan fundamental tadqiqotlari, zamon talablariga javob beradigan yuksak, mazmunan dolzarb ijodiy ishlari uchun bir qator soha vakillari davlat mukofotlari bilan taqdirlangan.

Birinchi darajali davlat mukofotlari

fan va texnika sohasida:

Sanakulov Kuvandik, Snitka Nikolay Pavlovich, Usmanov Rustamjon, Ergashev Ulugbek Abdurasulovich, Mustakimov Otabek Mannabiyevichga — "Texnologik va ishlanishi murakkab bo‘lgan oltin tarkibli ma’danlarni qayta ishlash va o‘zlashtirishning kompleks texnologiyalarini ishlab chiqish va joriy etish" bo‘yicha ilmiy-amaliy ishlanmasi uchun;

adabiyot sohasida:

Karimov Naim Fatihovichga — "Abdulla Qodiriy zamondoshlari" asari uchun;

san’at va me’morchilik sohasida:

Alikulov Alisher Mahmudovichga — Samarqand viloyatidagi Imom Buxoriy ilmiy-tadqiqot markazi hamda Toshkent shahridagi "Gʻalaba bog‘i" yodgorlik majmuasida joylashgan "Shon-sharaf" muzeyida ishlangan mahobatli rangtasvir asarlari uchun.

Ikkinchi darajali davlat mukofotlari

fan va texnika sohasida:

Kvint Vladimir Lvovichga — "Amir Temurning strategik yetakchiligi: ‘Tuzuklar’ga izohlar" ilmiy monografiyasi uchun;

san’at va me’morchilik sohasida (san’at va me’morchilik sohasida ko‘zda tutilgan 1 ta ikkinchi darajali Davlat mukofoti o‘rniga 2022 yil uchun istisno tariqasida 2 ta ikkinchi darajali davlat mukofoti berilishi belgilansin):

Mirtadjiyev Djalalitdin Tursunovichga (marhum) — mustaqillik yillarida O‘zbekistonda va bir qator xorijiy mamlakatlarda ishlangan haykaltaroshlik asarlari uchun;

Muhammeddinov Najimaddinga — "Gulla-yashna, O‘zbekistonim!" simfonik poemasi, "Ayjamal" baleti va "Guloyim" operasiga yozilgan musiqiy kompozisiyalari uchun.

• Farmoyish
• Prezident
• Shavkat Mirziyoyev