Polshaning aviatsiya sohasini yoritishga ixtisoslashgan Rynek Lotniczy internet portalida “O‘zbekistondagi “Qanot Sharq Airlines” xususiy aviakompaniyasining navbatdagi xaridlariga bag‘ishlangan maqola e’lon qilindi”, – deb xabar bermoqda “Dunyo” axborot agentligi.

Portal ma’lumotiga ko‘ra, o‘tgan hafta “Air Lease Corporation” (ALC) kompaniyasi “Qanot Sharq Airlines” xususiy aviakompaniyasi o‘rtasida beshta yangi Airbus A321neo samolyoti, shu jumladan, A321XLR modelining modifikatsiyasi uchun uzoq muddatli lizing shartnomalari tuzilgani e’lon qilindi.

Qayd etilganidek, beshta Airbus A321neo samolyoti lizingi o‘z ichiga ikkita A321LR va uchta A321XLR modellarni oladi. “O‘zbekiston aviakompaniyasi mazkur samolyotlarni 2026 va 2027-yillarda qabul qilib oladi”, – deb yozgan manba.

“Ushbu zamonaviy havo kemalari bizga yangi yo‘nalishlarni ochish, yoqilg‘i samaradorligini oshirish va yo‘lovchilariga eng yaxshi xizmatlarni taqdim etish imkonini beradi”, – deya “Qanot Sharq Airlines” aviakompaniyasi rahbari Nosir Abdug‘afforov so‘zlaridan iqtibos keltirilgan materialda.

Hozirgi kunda o‘zbek aviakompaniyasi parki yettita Airbus samolyoti, shu jumladan, ikkita A320, ikkita A321neo va uchta A330-200 dan iborat. “Shuningdek, aviakompaniya yana oltita Airbus samolyoti yetkazib berilishini kutmoqda. Ulardan ikkitasi A321LR, uchta A321XLR va bittasi A330-200 rusumli samolyotlardir”, – deyilgan maqolada.

• Samolyot