Tibbiyotda “Fil odam” sindromi deb nomlangan kasallik bor. Ilmiy tilda neyrofibromatoz (Reklingxauzen sindromi) deb ataladigan bu noyob nasliy xastalik dunyoda har 100 ming aholiga 30-40 nafarga to‘g‘ri keladi, teri, asab, tayanch-harakatlanish tizimlari, ko‘rish, endokrin a’zolari zararlanishi bilan kechadi.

Respublika ixtisoslashtirilgan onkologiya va radiologiya ilmiy-amaliy tibbiyot markazi Qashqadaryo filiali jarrohlik bo‘limida uzoq yillar mana shu kasallikdan aziyat chekib kelgan bemorda jarrohlik amaliyoti muvaffaqiyatli bajarildi.

Gʻuzorlik II guruh nogironi, 39 yoshli erkak bemor belining chap sohasidagi katta o‘sma shish (neyrofibromatoz, 1-tip) harakatda noqulaylikka, holsizlikka sabab bo‘lib kelgan. Jarrohlar Gʻiyosiddin Xalilov, Abdusalim Mo‘minov va Abduvali Abrayev tomonidan bajarilgan operasiya natijasida bemor tanasidan 5 kilogrammlik o‘sma olib tashlandi. Ayni paytda ahvoli qoniqarli bo‘lgan bemor rejali muolajalarni davom ettirmoqda.

• Jarrohlik
• Qashqadaryo
• Shifokor