Born Rebni tomonidan 2008-yilda asos solingan Bellator (aralash jang san’ati) Ligasi endi yo‘q.

Nufuzi jihatidan UFCdan keyin turgan promoushen 17-yillik faoliyatdan keyin rasman tugatildi. Bu haqda PFL Ligasi rahbarlari xabar berishdi. Aynan PFL 2023-yilning noyabr oyida Bellator brendini “Paramaunt” kompaniyasidan sotib olgan edi.

“PFL bir yil oldin Bellator MMA ligasini yuqori saviyali jangchilarga ega ekanligi uchun sotib olgandi. PFL brendi allaqachon “g‘alaba qozon va harakatni davom ettir” formatining sinonimi hamda innovatsion mahsulotga aylanib ulgurgan. Bundan keyin barcha musobaqalar PFL brendi ostida o‘tkaziladi. Bellator esa ajoyib tarixi bilan esda qoladi”, – degan PFL asoschisi va hozirda uning boshqaruv raisi Donn Devis.

Endilikda birlashgan tizim PFL Champions Series nomidan turnirlar o‘tkazadi. Hozircha Bellator chempionlari hisoblangan: Usman Nurmagomedov, Patrisio Freyre, Kori Anderson singari jangchilarning taqdiri noma’lumligicha qolmoqda. Ular PFL chempionlari deb yuritilishi va yoki qaytadan PFL kamari uchun jang qilishlari ham ma’lum emas.

• Bellator
• MMA