Rossiyalik musiqachi va teleboshlovchi Basta (Vasiliy Vakulenko) Birinchi kanal orqali efirga uzatiluvchi “Kechki Urgant” shousining yangi boshlovchisiga aylanishi mumkin.

Teleshouning avvalgi boshlovchisi Ivan Urgant tomonidan Rossiyaning Ukrainadagi harbiy harakatlari tanqid qilinganidan keyin shou efirdan olib tashlangan edi. Urgantning oʻzi ushbu voqeaga hech qanday izoh bermagan, muxlislar esa koʻrsatuvning tez orada Urgant ishtirokisiz efirga uzatila boshlashini taxmin qilishgan.

Vasiliy Vakulenko (Basta) mazkur shou boshlovchiligi uchun sinovdan oʻtayotganini maʼlum qildi.

“Ayni vaqtda “Kechki Urgant”da boshlovchilik qilish uchun sinov topshiryapman, bundan nima chiqishini koʻramiz”, dedi reper.

Shouning avvalgi boshlovchisi Ivan Urgant Rossiyaning Ukrainadagi harbiy harakatlari boshlangan fevral oyidan buyon omma qarshisida koʻrinish bergani yoʻq. Uning muallifligidagi shou efirdan olib tashlangach, YouTube platformasi ham “Kechki Urgant”ning rasmiy kanallarini bloklab qoʻygan edi.

• Shou-biznes
• mashhurlar