Samarqand va Sirdaryo viloyatlarida fuqarolarni avval xorijiy o‘qishga kirgizib, keyin o‘qishni O‘zbekistonga ko‘chirib berishni va’da qilgan firibgarlar ushlandi. Bu haqda  Iqtisodiy jinoyatlarga qarshi kurashish departamenti xabar berdi.

Qayd etilishicha, Bosh prokuratura huzuridagi Departamentning Urgut tuman bo‘limi tomonidan DXX va IIB xodimlari bilan hamkorlikda tezkor tadbir o‘tkazilgan. Tadbir davomida aniqlanishicha, D.V. isimli fuqaro boshqa bir A. isimli fuqaroni tanishlari orqali Qozog‘iston Respublikasidagi universitetlardan biriga  to‘g‘ridan-to‘g‘ri 3-kursiga o‘qishga kiritib, keyinchalik o‘qishini O‘zbekistonga ko‘chirib berishni aytgan. Buning evaziga esa, 3 500 AQSh dollari so‘ragan.

Shundan so‘ng, fuqaro D.V.  kelishilgan pullarni olgan vaqtida huquq tartibod xodimlari tomonidan qo‘lga olingan.  

Shuningdek, D.V. fuqaro M.ni qo‘shni Tojikiston Respublikasidagi universitetga o‘qishga kiritib, O‘zbekistonga ko‘chirib berish evaziga 3 000 AQSH dollari olganligi ham aniqlangan.

Bundan tashqari, Departament hamda DXXning Guliston tumani bo‘limlari tomonidan o‘tkazilgan tezkor tadbirda, fuqaro F.G. boshqa bir fuqaro R.ni tanishlari orqali Ukraina Respublikasidagi universitetlardan birida o‘qiyotganligi haqida hujjat qilib, o‘qishini Guliston Davlat universitetiga ko‘chirib berish evaziga 3 200 AQSH dollari so‘rab, shundan 1 500 AQSH dollarini olgan vaqtda ashyoviy dalillar bilan ushlangan.

Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.

• Firibgarlik
• Jinoyat
• Samarqand
• Sirdaryo
• Universitet
• Xorij