29 yoshli xonanda Selena Gomes kanadalik ijodkor Jastin Biber bilan munosabatlariga nuqta qoʻyish oson boʻlmagani va ayriliq uning uchun ogʻir kechgani haqida gapirdi. Yulduzli juftlik bir necha yil davomida uchrashib yurgan, Jastin Biber Selena Gomes bilan munosabatlarga nuqta qoʻyganiga koʻp boʻlmay turib, taniqli model Xeyli Bolduinga uylangan.

Selenaning aytishicha, Jastin Biberdan ayrilish oʻzini yaxshiroq anglashiga yordam bergan.

“Teri siliga qarshi kurashdim, buyragim bilan bogʻliq muammolar yuzaga keldi. Aslida barchasi juda qiyin edi. Ammo, hozirgi kunga kelib boʻlgan ishlarning hammasi menga juda koʻp narsa berganini aytishim kerak. Bularning barchasi feʼl-atvorimga taʼsir qildi: endilikda boʻlmagʻur narsalar yoki hurmatsizlikka toqat qilmayman, ushbu vaziyatdan mana shunday chiqa olganim bilan faxrlanaman”, dedi ijodkor.

Selenaning aytishicha, ayriliq uning ruhiy salomatligiga ham salbiy taʼsir koʻrsatgan. “Barchasini boshdan kechirishim kerak boʻlgan ekan. Koʻp narsalarni qaytadan koʻrib chiqishimga toʻgʻri keldi”, dedi Selena.

Yulduzli juftlikning ayrilishiga aynan nima sabab boʻlgani nomaʼlum. Ularning muxlislari Jastin Biberni Xeyli Bolduinga Selena Gomesni azoblash uchun qasdma-qasd uylanishda ayblaganlar. Selenaning muxlislari bugungi kunga qadar Biberni Gomesga ozor bergani uchun kechira olishmaydi.

• Shou-biznes
• mashhurlar