O‘zbekiston Respublikasi prezidenti Shavkat Mirziyoyev Malayziya Bosh vaziri Anvar Ibrohimning taklifiga binoan 4-fevral kuni kechqurun rasmiy tashrif bilan ushbu mamlakatga yetib bordi.

Kuala-Lumpur xalqaro aeroportida davlatimiz rahbarini Malayziya parlamenti Vakillar palatasi spikeri Johari bin Abdul, ta’lim vaziri Zambri Abdulqodir va boshqa rasmiy shaxslar kutib olgan.

O‘zbekiston yetakchisining tashrifi sharafiga faxriy qorovul saf tortib, ikki mamlakat davlat bayroqlari ko‘tarilgan.

O‘zbekiston rahbari aeroportda Malayziya parlamenti spikeri bilan uchrashuv o‘tkazgan. Bo‘lajak oliy darajadagi uchrashuvlar kun tartibi yuzasidan fikr almashilgan.

Parlamentlar doirasida faol hamkorlik va almashinuvlarni davom ettirish, o‘zaro tashriflar va do‘stlik guruhlari tadbirlarini tashkil etish, qonun ijodkorligi masalalarida amaliy hamkorlikni yo‘lga qo‘yish, muhim investitsiyaviy, infratuzilmaviy, ijtimoiy va madaniy-gumanitar dasturlarni amalga oshirishga ko‘maklashish masalalariga alohida e’tibor qaratilgan.

Tashrif dasturining asosiy tadbirlari ertaga, 5-fevral kuni bo‘lib o‘tadi.

O‘zbekiston prezidenti va Malayziya bosh vaziri oliy darajada muzokaralar o‘tkazadi hamda O‘zbekiston-Malayziya biznes forumida ishtirok etadi. Sammit yakunida qator hukumatlararo va idoralararo hujjatlar imzolanishi ko‘zda tutilgan.

• Malayziya
• O‘zbekiston
• Prezident
• Tashrif