Hozirda jahonning ko‘plab mamlakatlarida o‘zbekistonlik futbolchilar to‘p surishadi va deyarli har hafta klublari safida o‘yin o‘tkazishadi. Xabardor.uz yakunlangan haftada legionerlarimizning klublari safida o‘tkazgan o‘yinlarini tahlil qilib chiqadi.

Italiya
O‘zbekiston milliy terma jamoasi a’zosi Eldor Shomurodovning “Roma” klubi ichki chempionatdan tashqari Konferensiyalar Ligasida ham ishtirok etdi. Sofiyada SSKAga qarshi maydonga tushgan rimliklar 3:2 hisobida g‘alaba qozonishdi. Uchrashuvning 68-daqiqasida zaxiradan maydonga qo‘shilgan Eldor uchrashuv so‘ngigacha faol harakat qildi, biroq gol urish unga nasib etmadi.
13 dekabr kuni esa Joze Mourino shogirdlari A Seriya doirasida “Spesiya”ga qarshi o‘yin o‘tkazib, 2:0 hisobida zafar quchishdi. Biroq bu o‘yinni "Shoma" zaxirada o‘tkazdi. Murabbiylar Eldor Shomurodovdan ko‘ra, Borxa Mayoralga imkon berishni ma’qul ko‘rishdi.

Rossiya
Joriy mavsumda RPLda ikki nafar o‘zbekistonlik futbolchi harakat qilmoqda. Mavsum boshida “Paxtakor”dan “Nijniy Novgorod”ga borib qo‘shilgan Ibrohimxalil Yo‘ldoshev asta-sekin Rossiya futboliga moslashib bormoqda. 20 yoshli qanot himoyachi jamoasi so‘nggi turda “Krasnodar” maydoniga safar uyushtirdi. O‘yinni asosiy tarkibda boshlagan Yo‘ldoshev to‘liq 90 daqiqa maydonda faol harakat qildi va klubining durang o‘ynashiga (0:0) katta hissa qo‘shdi.
“Ufa” sharafini himoya qilayotgan Oston O‘runov jarohati tufayli “Lokomativ”ga qarshi bahsni o‘tkazib yubordi. Moskvada kechgan bahsda ufaliklar 0:2 hisobida mag‘lub bo‘lishdi.

Janubiy Koreya
Janubiy Koreyada kamdan-kam uchraydigan holat yuz berdi, ya’ni quyi divizion vakili mamlakat Kubogini qo‘lga kiritib, Osiyo Chempionlar Ligasida ishtirok etish huquqini qo‘lga kiritdi. Quvonarlisi, “Chonnam Dragonz” sharafini himoya qilayotgan Oleg Zateyev Kubokdagi muvaffaqiyatda katta rol o‘ynadi. 32 yoshli futbolchi “Tegu”ga qarshi bahsni (4:3) to‘liq maydonda o‘tkazdi va jamoasining gollaridan biriga mualliflik qildi.

BAA
Yana bir O‘zbekiston terma jamosi a’zosi Otabek Shukurovning “Sharja” klubi dam olish kunlari BAA Kubogi doirasida “Emireyts” maydoniga safar uyushtirdi va durang o‘ynadi. Markaziy yarim himoyachi uchrashuvda to‘liq, o‘z darajasida to‘p surdi.

Saudiya Arabistoni
Jaloliddin Masharipov to‘p suruvchi “Al-Nasr” klubi yangi murabbiy qo‘l ostida ilk uchrashuvini o‘tkazdi va Saudiya Arabistoni chempionati doirasida “Al-Tai” maydonida 1:2 hisobida taslim bo‘ldi. Masharipov o‘yinni zaxirada boshladi va ikkinchi bo‘limda maydonga tushirildi. Aynan Masharipovning faolligi sababli, ar-riyodliklar so‘nggi daqiqalarda o‘zlarining yagona gollarini kiritishdi. 

Moldova
“Sherif” hujumchisi Jasur Yaxshiboyev olgan jarohatlari sababli, bir nechta o‘yinni o‘tkazib yuborishga majbur bo‘lmoqda.

• Futbol
• O‘zbekiston
• Sport
• Xorij