Kecha, 8-dekabr kuni Xitoy rahbari Si Szinpin Ar-Riyoddagi qirollik saroyida Saudiya Arabistoni qiroli Salmon bin Abdulaziz Ol Saud bilan uchrashdi.

Qayd etilishicha, Si Szinpin olti yildan so‘ng Saudiya Arabistoniga yana tashrif buyurganidan juda xursand ekanligini ta’kidlagan. U “Xitoy-Saudiya munosabatlarini rivojlantirish bo‘yicha erishilgan muhim konsensus endi hamkorlikning aniq mevasiga aylanayotganidan xursandman”, – deya ushbu mamlakatga so‘nggi tashrifi tafsilotlarini esladi XXR raisi. Uning so‘zlariga ko‘ra, Xitoy-Saudiya hamkorligi keng istiqbolga ega.

Si Szinpinga ko‘ra Xitoy Xalq Respublikasi Saudiya Arabistonini ko‘p qutbli dunyoning muhim kuchi, deb biladi va ushbu mamlakat bilan har tomonlama strategik sheriklikni rivojlantirishga katta ahamiyat beradi. Shuningdek, u Xitoy Saudiya bilan strategik aloqalarni yanada mustahkamlash, turli sohalarda hamkorlikni chuqurlashtirish, ikki davlat taraqqiyoti manfaatlariga xizmat qilish, dunyo tinchligi va barqarorligini qo‘llab-quvvatlashga tayyor ekanini ta’kidlagan.

Salmon bin Abdulaziz Ol Saud, o‘z navbatida, Si Szinpinning mamlakatga 2016-yildagi muvaffaqiyatli tashrifini unutilmas, deb atadi.

Qirol Saudiya Arabistoni va Xitoy turli sohalardagi strategiya va hamkorlikni bog‘lashda ijobiy yutuqlarga erishganini aytdi. Tomonlar ko‘plab masalalarda muhim kelishuvga erishdi. Qirol Xitoyning manfaatlari Saudiya Arabistonining ham manfaatlari ekanligini alohida ta’kidlagan.

“Men Xitoy bilan munosabatlarni rivojlantirishga katta e’tibor qarataman va Saudiya-Xitoy har tomonlama strategik sheriklik munosabatlari ikki davlatning do‘st xalqlari manfaati uchun uzluksiz rivojlanishini ta’minlash yo‘lida siz bilan birga ishlashga tayyorman. Bu mintaqa va butun dunyoda tinchlik, barqarorlik rivojiga foyda keltiradi”, – dedi Shayx Salmon.
Ikki davlat rahbarlari Xitoy va Saudiya Arabistoni o‘rtasida har tomonlama strategik sheriklik munosabatlari to‘g‘risidagi bitimni imzolab, har ikki yilda bir marta ikkala mamlakatda navbat bilan davlat rahbarlari uchrashuvini o‘tkazishga kelishib oldi. Shuningdek energetika sohasi bo‘yicha bir nechta muhim hujjatlar imzolangan.

Bugun, 9-dekabr kuni Xitoy rahbari Fors ko‘rfazi davlatlarining rahbarlari bilan uchrashadi.

• Muzokara
• Saudiya Arabistoni
• Si Szinpin
• Tashrif
• Xitoy