Xalqaro “Siena International Photo Awards 2021” tanlovi yetti yildan buyon har yili oʻtkazib kelinadi. Tanlov gʻoliblari 11 ta yoʻnalish boʻyicha tanlab olinadi, bu yili ular orasiga koronavirus pandemiyasiga bagʻishlangan “COVID-19” yoʻnalishi ham qoʻshilgan.
Gʻolib boʻlgan surat egalarini taqdirlash marosimi shu oyda Italiyada oʻtkaziladi. Gʻoliblikka erishgan eng qiziqarli fotosuratlarni koʻrib chiqishga tayyormisiz?
“Yil surati: Hayot mashaqqati” yoʻnalishi. Suratdagi erkakning ismi Munzir, u Suriyadagi Idlib viloyatiga bomba tashlangan vaqtda oʻng oyogʻidan ayrilgan. Uning oʻgʻli Mustafo esa tugʻma kasallik tufayli qoʻl-oyoqsiz dunyoga kelgan. Oʻz vaqtida Suriyada zaharli gaz tarqatilgani tufayli Mustafoning onasi – Zaynab maxsus dori vositalarini ichishga majbur boʻlgan, ular esa Mustafodagi tugʻma kasalliklarga sabab boʻlgan.
“Koʻcha surati: Bolalik” yoʻnalishida gʻolib boʻlgan suratda Gavanada argʻimchoq uchayotgan bolalar aks etgan.
“Sayohat va sarguzasht” yoʻnalishida gʻolib boʻlgan suratda yovvoyi filning odam toʻla mashinaga hujum qilganini koʻrish mumkin. Muallif bu orqali odamlarga tabiatni hurmat qilish kerakligi, u haqida qaygʻurish lozimligini taʼkidlashga harakat qilgan.
“Hujjatli fotojurnalistika” yoʻnalishida “Asir” nomli surat gʻolib boʻldi. Surat bosh qahramoni – Xitoyning Shensi korxonasidagi qafas ichida oʻtirgan ulkan ayiq. Bu yerda mahkumlikda tugʻilgan pandalar tashrif buyuruvchilar uchun koʻngilochar ovunchoq vazifasini oʻtaydi.
“COVID-19” yoʻnalishida “Tugʻilgan kun” surati gʻolib boʻldi. Suratda San-Karlos-de-Chelanova qariyalar uyi xodimlari 98 yoshli Yelena Peresni tavallud kuni bilan tabriklashmoqda. U ikki hafta avval koronavirusdan tuzalgan.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!