Fransiyalik grossmeyster sog‘lig‘idagi jiddiy muammolarga qaramay, Ruminiyada bo‘lib o‘tayotgan “Grand Chess Tour” turniridagi ishtirokini davom ettirishga qaror qildi. U o‘zining holati va musobaqani tark etmaslik sabablari haqida shunday dedi: “Menga dam olish ham kerak. Xayriyatki, shaxmatni hatto yotib ham o‘ynash mumkin. Oldinda hali beshta yaxshi partiya bor. Shuning uchun o‘ynashda davom etmoqchiman”. Firuzja shifokorlar ruxsati va tashkilotchilarning yordami haqida ham to‘xtalib, “Shifokorga borganimizda, u  agar sharoitlar mos kelsa, o‘ynashim mumkinligini aytdi. Keyingi savol tashkilotchilar buni tashkil qila olishi va raqib o‘yinchilar bunga rozi bo‘lishi bilan bog‘liq edi. Hammasi ijobiy hal bo‘ldi. Shunday vaziyatda o‘yinlarni boy berish juda achinarli bo‘lardi”, – deya ma’lum qildi.

Shuningdek, u Sindarovga qarshi o‘yini haqida ham o‘z fikrini bildirdi: “Sindarov bilan o‘yin unchalik qoniqarli bo‘lmadi, lekin oxirida, pozitsiyam ancha yomon bo‘lishiga qaramay, endshpilda yaxshiroq o‘ynashga muvaffaq bo‘ldim. Avvaliga yaxshi o‘ynamagan bo‘lsam-da, endshpil qanday o‘tganidan mamnunman”.

Ma’lumot uchun, 5-tur doirasidagi Javohir Sindarov – Alireza Firuzja partiyasida durang natija qayd etilgandi.

• Ruminiya
• Shaxmat
• Sport