Davlat xavfsizlik xizmatining Sirdaryo viloyati bo‘yicha boshqarmasi va Iqtisodiy jinoyatlarga qarshi kurashish departamentining hududiy boshqarmasi xodimlari hamkorligida olib borilgan o‘rganishlar natijasida yo‘l infratuzilmasi obyektlarida byudjet mablag‘larini talon-toroj qilish holatlari aniqlandi.

Xususan, 2020-2021 yillarda Boyovut tumani yo‘llardan foydalanish unitar korxonasi tomonidan tumandagi umumfoydalanuv avtomobil yo‘llari va “Obod qishloq” dasturiga asosan ichki yo‘llarda amalga oshirilgan qayta taʼmirlash ishlari nazorat o‘lchovidan o‘tkazilganda, mazkur korxona mansabdor shaxslari o‘zaro til biriktirib, hisobotlarga bajarilmagan ishlarni qo‘shib yozish orqali jami 1 mlrd. 525 mln. so‘m miqdoridagi byudjet mablag‘larini rastrata qilish yo‘li bilan talon-toroj qilganliklari maʼlum bo‘ldi.

Hozirda Boyovut tumani yo‘llardan foydalanish unitar korxonasi mansabdor shaxslariga nisbatan Jinoyat Kodeksining 167- (“O‘zlashtirish yoki rastrata yo‘li bilan talon-toroj qilish”) va 209- (“Mansab soxtakorligi”) moddalari bilan jinoyat ishi qo‘zg‘atilib, tergov harakatlari olib borilmoqda.

• Bosh prokuratura
• Davlat byudjeti
• Jinoyat
• Sirdaryo