“Radisson” mehmonxonalar guruhi “Metropol Group” MCHJ bilan Toshkentda premium-klassdagi yangi mehmonxona ochish bo‘yicha kelishuv imzoladi. Bu haqda O‘zbekiston mehmonxonalar assotsiatsiyasi xabar berdi.

Qayd etilishicha, “Radisson Collection Hotel” nomli yangi mehmonxona shahar markazida, Sayilgoh ko‘chasidagi (xalq tilida “Brodvey”) sobiq Milliy xavfsizlik xizmatining bosh binosi o‘rnida joylashadi.

Qurilajak mehmonxona kompleksi yaxlit me’moriy uslubga ega 4 ta binodan iborat bo‘lishi, asosiy va eng baland bino 22 qavat bo‘lib, unda 27 ming kv.m. maydonga ega “Radisson Collection Hotel” joylashishi kutilmoqda.

Premium toifadagi otel mijozlarga 164 ta xona, xususan prezident lyuks xonalarini taklif etadi.

Majmua hududi jamoat joyi, savdo zonalari, kinoteatr, ofislar, apartamentlar va ko‘p qavatli yerosti avtoturargohni o‘z ichiga oladi.

“Radisson Collection” – bu mahalliy diqqatga sazovor joylarga yaqin joylashgan eksklyuziv, premium mehmonxonalar to'plami. “Radisson Collection” mehmonxonalarining barchasi mehmondo'stlikning eng so'nggi standartlariga javob beradi, ular maxsus dizaynni ajoyib restoran, fitnes va kurort tajribasi bilan uyg'unlashtiradi”, – deyiladi xabarda.

Eslatib o‘tish mumkin, “Metropol Group” sobiq MXX binosini 2021-yil iyulida 210 mlrd so‘m evaziga xususiylashtirgan. Bu kompaniyaning 100 foizi ulushi sobiq tashqi ishlar vaziri Abdulaziz Komilovning o‘g‘li Doniyor Komilovga tegishli ekani ko'rsatilgan.

• DXX
• Mehmonxona
• Qurilish vazirligi