Butun dunyo bo‘ylab uy-joylarning qisqa muddatli ijarasi mavjud bo‘lgan Airbnb onlayn platformasi ajoyib e’lon berdi. Icons yangi loyiha dasturi asosida kompaniya multfilmlar va komikslardagi uylarning nusxasini yaratmoqda. Loyihaga ko‘ra, birinchi bo‘lib “Yuqoriga” multfilmidagi uchar uy qurib bitkazildi.

Uchar uy binosi Nyu-Meksiko shtatining Abikiu shahrida joylashgan. Uyni minglab sharlar osmonga ko‘tarib turgandek ko‘rinadi, lekin aslida xonadon maxsus qurilish krani orqali yuqoriga ko‘tarib qo‘yilgan.

Ijara haqidagi e’londa uy egasi quyidagi so‘zlarni yozib qoldirgan:

“Marhamat, men va azizim Elli bilan birga qurgan shinam uyimizga tashrif buyuring. Bu yerda hayotimdagi eng katta sarguzashtlarim bo‘lib o‘tgan. Shuni angladimki, barcha yaxshi va qadrli hodisalar eng yaqin insonlaringiz bilan sodir bo‘ladi”, ­ deyiladi e’londa.

Uchar uyning interyerida ham “Yuqoriga” multfilmidagi barcha elementlar mavjud. Xonadondagi har bir mebel va predmetlar qo‘l mehnati hisoblanadi.

15 metr balandlikka ko‘tarilgan va 8000 dan ortiq sharlar bilan bezatilgan mazkur uy 14-maydan boshlab o‘z eshiklarini ochadi. Manbalarga ko‘ra, bir kunlik ijara haqi bir kishi uchun o‘rtacha 100 dollarni tashkil qiladi.

• Multfilm