UFC sobiq jangchisi Liana Jojua rossiyalik Daria Jeleznyakova bilan duelda magʻlub boʻldi. Jang Parijda Ares FC 6 turnirining dastlabki kardi doirasida boʻlib oʻtdi.

Jang toʻliq uch raund ham davom etgan va bir ovozdan Jeleznyakovaning gʻalabasi bilan yakunlangan.

Jojua uchun bu magʻlubiyat qatorasiga uchinchisi boʻldi. Va bu UFCdan haydalganidan keyingi birinchi jang edi.

Jojuaning soʻnggi jangi 2021-yilning noyabrida UFC Vegas 42 musobaqasida amerikalik Kortni Keysiga qarshi boʻlgan edi. Oʻshanda jang bir ovozdan Jojuaning magʻlubiyati bilan yakunlangan.

Maʼlumot uchun, Liana MMAda hammasi boʻlib sakkizta gʻalaba va oltita magʻlubiyat qayd etgan.

Jeleznyakova aralash yakkakurashlar boʻyicha yettita jangda yettinchi gʻalabasini qoʻlga kiritdi. Rossiyalik ayol uchun bu jang promouterlik debyutiga ham aylandi.

Eslatib oʻtamiz, avvalroq Jojua endi avvalgidek sportga muhabbati yoʻqligi haqida gapirgan edi.

• Ayollar
• MMA
• UFC
• Xorij