Giyohvand moddalarning noqonuniy aylanmasiga qarshi kurashish doirasida DXXning Surxondaryo viloyati bo‘yicha boshqarmasi xodimlari tomonidan Termiz shahrida o‘tkazilgan tezkor-qidiruv tadbirlari natijasida katta miqdordagi narkotiklar musodara qilindi.

Xususan, 1982-yilda tug‘ilgan mahalliy fuqaro 28 kg. 895 gr. “opiy” hamda 2 kg. “gashish” moddalarini, shuningdek, boshqa bir holatda esa muqaddam giyohvand moddalar bilan bog‘liq jinoyat sodir etganliklari uchun sudlangan, 1962 va 1970-yillarda tug‘ilgan aka-uka 9 kg. 161 gr. “opiy” va 446 gr. “geroin” moddalarini kelgusida sotish maqsadida qabul qilib olgan vaqtlarida ashyoviy dalillar bilan ushlandi.

Ta’kidlash lozimki, har ikki holatda ham giyohvand moddalar afg‘onistonlik narkokuryerlar tomonidan mamlakat hududiga olib o‘tilgan.

Sariosiyoda kuzatilgan holatda tojikistonlik narkokuryerlar tomonidan tumanning tog‘li hududiga o‘tkazilib, xufiya joyga berkitib ketilgan 28 kg. 506 gr. “opiy” moddasini qabul qilib olgan 1990-yilda tug‘ilgan mahalliy fuqaro ushlandi.

DXX xodimlarining Surxondaryo viloyati bojxona boshqarmasi bilan hamkorlikda Termiz shahrida o‘tkazgan tezkor tadbirida esa 1969, 1970 va 1990-yillarda tug‘ilgan 3 nafar fuqaro 481 gr. “opiy” moddasini 9 400 AQSh dollariga sotayotgan vaqtlarida qo‘lga olindi.

DXX, IIV hamda Davlat bojxona qo‘mitasining hududiy boshqarmalari xodimlari hamkorligida o‘tkazilgan tezkor tadbirda, Termiz tumani “Manguzar” YPX maskanidan o‘tib, viloyat markazi tomon harakatlanayotgan “Spark” rusumli avtomashina to‘xtatildi.

Avtomashina ko‘zdan kechirilganda, unda yo‘lovchi sifatida ketayotgan, Dushanbe shahrida istiqomat qiluvchi, 1987 yilda tug‘ilgan Tojikiston Respublikasi fuqarosi va Denov tumanida yashovchi, 1985-yilda tug‘ilgan mahalliy fuqaroga tegishli yuk sumkalarida

Afg‘onistondan kontrabanda yo‘li bilan olib kelingan 45 kg. 913 gr. “gashish” borligi aniqlanib, ashyo protsessual tartibda rasmiylashtirib olindi.

O‘tkazilgan tezkor tadbirlar natijasida jami 67 kg. 43 gr. “opiy”, 47 kg. 913 gr. “gashish” hamda 446 gr. “geroin” giyohvand moddalari musodara qilindi.

Hozirda mazkur holatlar yuzasidan Jinoyat Kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.

• Giyohvandlik
• Jinoyat
• Surxondaryo