Surxondaryo viloyatining Oltinsoy va Termiz tumanlarida kredit mablag‘larini o‘zlashtirgan MCHJ rahbarlari aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish Departamentining matbuot xizmati xabar berdi.

Qayd etilishicha, Bosh prokuratura huzuridagi Departamentning Oltinsoy tumani bo‘limi tomonidan tergovga qadar tekshiruv o‘tkazilgan. Ushbu jarayon davomida, “O.B.” MCHJ rahbari R.H. bog‘ tashkil etish va qishloq xo‘jaligi texnikalari sotib olish uchun tijorat banki filialidan ajratilgan imtiyozli kredit evaziga hududda bog‘ tashkil etmasdan, ushbu mablag‘larni boshqa maqsadlarda sarflab, jami 6,1 mlrd so‘mni o‘zlashtirish yo‘li bilan talon-toroj qilganligi aniqlangan.

Shu kabi, Departamentning Termiz tumani bo‘limi tomonidan o‘tkazilgan tergovga qadar tekshiruvda, “B.N.” va “Ch.P.” MChJ lar rahbari U.X. hududiy tijorat banki filialidan ajratilgan kredit mablag‘lari evaziga qo‘shni Qozog‘iston Respublikasidan olib kelingan chorva mollarini boshqa shaxslarga sotib yuborib, jami 5,1 mlrd so‘m kredit mablag‘ini o‘zlashtirish yo‘li bilan talon-taroj qilganligi, shuningdek, 102,1 mln so‘m qo‘shimcha soliq va boshqa majburiy to‘lovlarni to‘lashdan bo‘yin tovlab kelganligi aniqlangan.

Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish), 181-1-moddasi (qasddan bankrotlikka olib kelish) va 184-moddasi (soliqlar yoki yig‘imlarni to‘lashdan bo‘yin tovlash) bilan jinoyat ishlari qo‘zg‘atilib, tergov harakatlari o‘tkazilmoqda.

• Kredit
• MCHJ
• Surxondaryo