Kecha, 10-iyun kuni Toshkent shahar Uchtepa tumanidagi 62-sonli maktabning informatika fani o‘qituvchisi maktab o‘quvchisi va uning oila a’zolari tomonidan kaltaklangani haqida xabar berilgan edi.

Holat bo‘yicha O‘zbekiston Respublikasi Prezidenti Administratsiyasi rahbarining o‘rinbosari Komil Allamjonov munosabat bildirdi.

“Toshkent shahar Uchtepa tumanidagi 62-sonli maktabning informatika fani o‘qituvchisini kaltaklashda ishtirok etgan kimki bo‘lsa, ularning barchasi qonunda belgilangan tartibda qattiq jazolanadi. Bu bo‘yicha huquq-tartibot organlariga kerakli ko‘rsatmalar berildi. Vallomati bo‘lsa ham, o‘qituvchini xafa qilishga hech kimning haqqi yo‘q”, – deb yozdi Komil Allamjonov.

Shuningdek, Maktabgacha va maktab ta’limi vaziri Hilola Umarova mazkur holatni shaxsan o‘zi nazoratga olganini ta’kidladi.

Holat bo‘yicha shahar IIBB qo‘shimcha ma’lumot e’lon qildi.

O‘zaro kelishmovchilik sababli kelib chiqqan mojaro natijasida o‘qituvchi tan jarohati olganligi holati yuzasidan Jinoyat kodeksining 277-moddasi («Bezorilik») bilan jinoyat ishi qo‘zg‘atilgan.

“Jinoyat ishi Toshkent shahar IIBB rahbariyati tomonidan nazoratga olingan. Tergov yakuni bo‘yicha qonuniy qaror qabul qilinishi va aybdor shaxsga nisbatan qat’iy chora ko‘rilishi ta’minlanadi”, – deyiladi xabarda.

• Kaltaklash
• Komil Allamjonov
• Maktabgacha va maktab ta'limi vazirligi
• Prezident Administratsiyasi