Murojaatni guruhning amaldagi rahbari Nayim Qosim 2024-yilda 20-sentyabrda Isroil tomonidan “Hizbulloh”ning sobiq harbiy qo‘mondoni Ibrohim Aqil va boshqa rahbarlari o‘ldirilganining bir yilligiga bag‘ishlangan telemurojaatda aytib o‘tgan.

Nayim Qosim Saudiya Arabistoni bilan muloqot uchun o‘zaro nizolar va xavotirlarni hal qilish, Isroilni qarshilik emas, balki dushman sifatida tan olish, shuningdek, Isroilga qarshi turishga e’tibor qaratish uchun o‘tgan kelishmovchiliklarni hozircha muzlatib qo‘yishni taklif qilgan.

“Hizbulloh” rahbari butun mintaqa “xavfli burilish nuqtasida” turganidan ogohlantirib, Isroilning Dohada XAMAS rahbariyatiga qarshi uyushtirgan hujumi mintaqada vaziyatni keskin o‘zgartirganini ta’kidlab o‘tgan.

“Yumshoq urush, sanksiyalar va “Ibrohim kelishuvlari“ AQSh va Isroil kutgan tezkor va hal qiluvchi g‘alabani ta’minlay olmadi, shu sabab ular uchun genotsid yechimga aylandi”, — deya Qosimning so‘zlarini keltirmoqda Al Jazeera.

Unga ko‘ra, Isroilning maqsadlari Falastindan tashqari Livan, Iordaniya, Misr, Suriya, Iroq, Saudiya Arabistoni, Yaman va Eronni ham qamrab oladi.

Bundan tashqari, Nayim Qosim “Hizbulloh”ning qurollari faqat Isroilga qaratilgani, Saudiya Arabistoni yoki dunyoning boshqa hech bir tomoniga emasligini urg‘uladi. Uning qayd etishicha, guruhga bosim o‘tkazish Isroil uchun sof yutuq, “Hizbulloh”ning yo‘qligi esa boshqa arab davlatlarini ham xavf ostiga qo‘yadi.

• Falastin
• Isroil
• Murojaat
• Saudiya Arabistoni
• hujum