Kecha, 26-mart kuni Toshkent shahar Olmazor tumani Qorasaroy ko‘chasi 69-uyning tunda hokimlik vakillari hamda MIB xodimlari tomonidan buzib tashlangani haqichda maʼlum qilingan edi.

Xabardor.uz so‘roviga ko‘ra Toshkent shahar sudi matbuot xizmati Fuqarolik ishlari bo‘yicha Shayxontohur tumanlararo sudining 2022-yil 17-fevraldagi qarori asosida maʼlumotni taqdim qildi.

Unga ko‘ra, daʼvogar Olmazor tuman hokimiyati 2022-yil 6-yanvarda javobgarlar Sh.A. va M.A. ga nisbatan majburiy ko‘chirish haqidagi daʼvo arizasi bilan fuqarolik ishlari bo‘yicha Shayxontohur tumanlararo sudga murojaat qilib, javobgarlarni oila aʼzolari bilan Toshkent shahar Olmazor tumani, Yog‘du ko‘chasida yangi qurilgan 6-uydagi 2 ta xonadonga majburiy ko‘chirish haqida qaror qabul qilishni so‘ragan.

Qayd etilishicha, javobgarlar istiqomat qilib kelgan xonadon Toshkent shahar hokimining 2017-yil 30 iyundagi 832-sonli va 2019-yil 27-maydagi 764-sonli qaroriga asosan buzilishga tushgan.

Olmazor tumani hokimiyati vakillari 2021-yil 10-dekabr, 13-dekabr va 14-dekabr kunlari xonadon egalari bilan gaplashib, oxirgi marta ularga tuman hududidan 2 ta xonadon taklif qilingan.

Xonadon egalari esa ko‘rsatilgan xonadonlarni olishni rad etgan va buzilayotgan uy-joy o‘rniga Shayxontohur tumani hududida qurilgan yangi uylardan olib berishni yoki ushbu buzilayotgan uy-joy o‘rniga 4 mlrd 360 mln so‘m (400 ming AQSh dollari) miqdorida pul mablag‘i berilishini talab qilgan.

O‘z navbatida mazkur uy-joy bilan 2021-yil 27-iyulda baholash ishlari olib borilgan. Baholash natijasida u bozor qiymatiga ko‘ra 763 mln 753 ming so‘mga baholangan. Fuqaroga taklif etilgan 2 ta xonadon esa tuman hokimligi va sotuvchi o‘rtasida ikki tomonlama kelishuv bitimiga asosan 1 mlrd 182 mln 384 ming so‘mga baholanib tuman hokimligi balansiga olingan.

Uy-joy egalarining rad javoblari sababli tuman hokimiyati sudga Sh.A. va M.A.ni oila aʼzolari bilan Toshkent shahar Olmazor tumani Yog‘du ko‘chasida yangi qurilgan 6-uydagi 2 ta xonadonga majburiy ko‘chirish haqida daʼvo arizasi kiritgan.

Fuqarolik ishi bo‘yicha sud majlisi 2022-yil 17-fevral kuniga tayinlangan va chaqiruvga qaramasdan sudga kelmagan javobgarlar ishtirokisiz o‘tgan sud majlisida ish sirtdan ko‘rilib, daʼvogar Olmazor tuman hokimiyatining daʼvo arizasini qanoatlantirish haqida hal qiluv qarori chiqarilgan.

Hal qiluv qarori 2022-yil 24-fevral kuni javobgarlarga jo‘natilgan.

Hal qiluv qarori ijro qilish uchun 2022-yil 17-mart kuni Olmazor tumani majburiy ijro byurosiga yuborilgan.

2022-yil 24-mart kuni javobgarlar tomonidan fuqarolik ishlari bo‘yicha Shayxontohur tumanlararo sudining 2022-yil 17-fevraldagi sirtdan chiqarilgan hal qiluv qarorini bekor qilish to‘g‘risida sudga ariza kelib tushgan.

Mazkur arizaning ko‘rilishi vaqti bo‘yicha taraflarga xabar berilgan.   

• Huquq
• Snos
• Sud
• Toshkent