Toshkent shahrida Turkiy davlatlar xalqaro universiteti tashkil etiladi. Shavkat Mirziyoyev 25-yanvar kuni tegishli qarorni imzolagan.

Qarorga ko‘ra, quyidagilar universitet faoliyatining asosiy yo‘nalishlari etib belgilangan:

– muhandislik, qurilish, logistika, axborot texnologiyalari va dasturlash, sog‘liqni saqlash, qishloq xo‘jaligi, oziq-ovqat sanoati hamda iqtisodiy va ijtimoiy soha uchun xalqaro standartlarga muvofiq oliy ma’lumotli kadrlar tayyorlash;

– o‘quv dasturlarini xorijiy, shu jumladan, Turkiyaning yetakchi oliy ta’lim tashkilotlari bilan hamkorlikda, shuningdek, qo‘shma ta’lim dasturlari asosida joriy etish hamda ilmiy-tadqiqotlar olib borish.

Ushbu universitet nodavlat oliy ta’lim tashkiloti hisoblanib, o‘z faoliyatini O‘zbekistonning ta’lim sohasidagi qonunchilik hujjatlari asosida amalga oshiradi.

2025-2026-o‘quv yilidan universitetda ta’lim jarayoni ta’lim sohasida xalqaro e’tirof etilgan tashkilotlar reytingida birinchi 1000 talik ro‘yxatga kirgan, shuningdek, o‘z yo‘nalishida yetakchi hisoblangan Turkiya oliy ta’lim tashkilotlarining o‘quv dasturlari asosida tashkil etiladi.

Universitetda talabalarni o‘qitish to‘lov-kontrakt asosida amalga oshiriladi hamda qabul parametrlari va to‘lov-kontrakt miqdori universitet tomonidan belgilanadi.

Universitet faoliyatini yo‘lga qo‘yish va muvofiqlashtirish bo‘yicha boshqaruv kengashi tashkil etiladi.

• Hamkorlik
• Mirziyoyev
• Qaror
• Toshkent
• Turkiya
• Universitet