Ijtimoiy tarmoqlarda Chilonzor tumanidagi “Katta Olmazor” mahallasida joylashgan ko‘p qavatli uylarning fasad qismidagi bezakli kafellarning usti bo‘yalayotganligi haqidagi xabarlar tarqaldi.

Chilonzor tumani hokimligi holat bo‘yicha rasmiy munosabat bildirdi.

Hokimlik bergan munosabatga ko‘ra, mahalladagi mazkur uylar qurilganiga 40 yildan oshganligi sababli fasadlardagi mozaikalar ham taʼmirtalab ahvolga kelib qolgan. Shu bois, 2022-yil 3-mart sanasidagi “Toshkent shahrida taʼmirlash va obodonlashtirish ishlarini amalga oshirish to‘g‘risida”gi Xalq deputatlari Toshkent shahar kengashi tomonidan qabul qilingan qaror asosida pudratchi tashkilot tomonidan mahalladagi 9 qavatli uylarning fasadlarida taʼmirlash ishlari boshlangan.

Lekin mazkur hududlarda yashovchilarning ayrimlarida taʼmirlash ishlariga eʼtiroz bo‘lganligi sababli hozirda uylarning yon qismidagi kafelli mozaikalarni bo‘yash ishlari to‘xtatilgan. Uylarning old va orqa qismlaridagi fasadlarni taʼmirlash ishlari esa davom ettirilmoqda.

Maʼlumot uchun, mazkur mozaikalar 1966-yildagi Toshkent zilzilasidan so‘ng qayta qurilgan ko‘p qavatli binolarga aka-uka – Nikolay va Pyotr Jarskiylar tomonidan ishlangan.

• Mozaika
• Toshkent