O‘zbekiston Respublikasi Prezidenti Shavkat Mirziyoyev bugun, 17-sentyabr kuni Ostona shahrida ikkinchi “Markaziy Osiyo – Germaniya” sammitida ishtirok etdi. Bu haqda Prezident matbuot xizmat xabar berdi.

Qozog‘iston Respublikasi Prezidenti Qosim-Jo‘mart To‘qayev raisligida o‘tgan tadbirda Germaniya Federal Kansleri Olaf Shols, Qirg‘iz Respublikasi Prezidenti Sadir Japarov, Tojikiston Respublikasi Prezidenti Emomali Rahmon va Turkmaniston Prezidenti Serdar Berdimuhamedov ham qatnashdi.

Markaziy Osiyo mamlakatlari va Germaniya o‘rtasidagi ko‘p qirrali hamkorlikni yanada chuqurlashtirish masalalari ko‘rib chiqildi. Investitsiya va texnologiyalar, o‘ta muhim xomashyo resurslari, “yashil” energetika, transport va logistika aloqalari, iqlim o‘zgarishiga qarshi kurashish sohalarida sheriklikni rivojlantirish, shuningdek, ta’lim va madaniy dasturlarni amalga oshirish masalalariga alohida e’tibor qaratildi.

O‘zbekiston Prezidenti o‘z nutqida Germaniya Markaziy Osiyo mamlakatlarida olib borilayotgan demokratik o‘zgarishlar va ijtimoiy-iqtisodiy islohotlarni, mintaqadagi hamkorlik va integratsiyani qat’iy hamda o‘zgarmas qo‘llab-quvvatlayotganini yuqori baholadi.

“Bizning Berlindagi ilk uchrashuvimiz va bugungi sammit aniq, amaliy natijalarga erishishga qaratilgan ochiq va konstruktiv muloqotimizni davom ettirishga bo‘lgan umumiy intilishimizni yana bir bor tasdiqlamoqda, - dedi Shavkat Mirziyoyev.

Davlat rahbari Germaniya bilan munosabatlar chuqur tarixiy ildizlarga ega ekani, Markaziy Osiyoda barqaror rivojlanish maqsadlarini ta’minlashda Federativ Respublikaning muhim o‘rnini alohida ta’kidladi. So‘nggi yillarda mintaqada yuz bergan chuqur o‘zgarishlar o‘zaro manfaatli hamkorlikni jadal rivojlantirishga xizmat qilayotgani qayd etildi.

Shuningdek, O‘zbekiston Prezidenti Markaziy Osiyoning Germaniya bilan har tomonlama hamkorligini yanada rivojlantirish maqsadida bir qator yangi tashabbus va takliflarni ilgari surdi.

Avvalo, O‘zbekiston rahbari Markaziy Osiyo va Germaniya o‘rtasida strategik mintaqaviy sheriklik o‘rnatilganini yuqori baholab, ustuvor yo‘nalishlarda dasturiy tadbirlarni qamrab olgan uzoq muddatli Hamkorlikni rivojlantirish konsepsiyasini qabul qilishni taklif etdi.

Ushbu hujjatni ishlab chiqish uchun “Markaziy Osiyo – Germaniya” tahliliy markazlari forumini ta’sis etish va uning birinchi uchrashuvini kelgusi yili Xivada o‘tkazish zarurligi ta’kidlandi.

Bundan tashqari, sammitlar kun tartibini tayyorlashda mamlakatlar tashqi siyosat idoralari rahbarlarining yillik uchrashuvlari muhim rol o‘ynashi qayd etildi.

• Ostona
• Shavkat Mirziyoyev
• sammit