Kursk viloyatida 6-8-sentyabrga belgilangan viloyat rahbari saylovlari muddatidan avval 28-avgust kuni boshlanadi. Bu haqda viloyat saylov komissiyasi qaror qabul qildi.

Qaror “Rossiya Federatsiyasi fuqarolarining xavfsizligi, hayoti va sog‘lig‘ini himoya qilish maqsadida” qabul qilindi, deyiladi saylov komissiyasining rasmiy bayonotida.

Eslatib o‘tamiz, Ukraina qurolli kuchlarining Kursk viloyatiga keng ko‘lamli hujumi 6-avgust kuni boshlangandi. Uch kundan keyin esa mintaqada aksilterror operatsiyasi rejimi e’lon qilindi.

Ovoz berish “o‘ta og‘ir vaziyatda o‘tadi”, – deb yozgan gubernator vazifasini bajaruvchi Aleksey Smirnov.

Ma’lumot uchun, Aleksey “Yagona Rossiya”dan gubernatorlikka nomzod sifatida ro‘yxatga olingan.

Shuningdek, Ukraina Qurolli kuchlarining Kursk viloyatiga bostirib kirishi boshlanganidan beri viloyatning to‘qqiz tumanidan 121 mingdan ortiq odam evakuatsiya qilindi, deb xabar bermoqda Favqulodda vaziyatlar vazirligi. Umuman olganda, viloyatning 180 ming aholisi evakuatsiya qilinishi kerakligi ta’kidlanmoqda.

• Rossiya
• Ukraina