«Ular o‘zi jinni shishadan chiqarib yuborishdi» – Putin Ukraina bo‘ylab zarbalar haqida.

Rossiya prezidenti Vladimir Putin VGTRK propagandachisi Pavel Zarubinga bergan «intervyu»sida Kiyevning maqsadi – Rossiya iqtisodiyotiga zarar yetkazish ekani, Rossiya bunga mos ravishda javob qaytarishini aytib o‘tdi. Quyida u bildirgan fikrlar qisqartirilgan va tahrirlangan shaklda keltiriladi. To‘liq matnni Kreml saytida o‘qish mumkin.

"Rossiya ukrainlarning 40 kunlik «ta’sir ko‘rsatish operatsiyasi»ga javoban Ukraina bo‘ylab zarbalarni kuchaytirdi. Ukraina qurolli kuchlari Rossiyaning fuqarolik obyektlari va logistikasiga yopirilma zarbalar yo‘llagandi. Ammo yakuniy natija Ukraina kutganining teskarisi bo‘ldi.

Kiyev iqtisodiyotimizga zarar yetkazishni o‘z oldiga maqsad qilib qo‘ygandi. Uning o‘zi Pandora qutisini ochib, jinni shishadan chiqarib yubordi. Endi o‘zingizning shusiz ham bazo‘r nafas olayotgan iqtisodiy tarmoqlaringizga javob beriladi. Qishloq xo‘jaligi sohasi ham shu jumladan. Bizning logistikamizni buzmoqchi bo‘ldingizmi? Javob kuttirmaydi. Qabul qilib oling.

Rossiyaning Ukraina bo‘ylab zarbalari Ukraina qurolli kuchlarining Rossiya bo‘ylab zarbalariga qaraganda samaraliroq, o‘z vaqtida berilmoqda va vayronkorroq bo‘lmoqda. Rossiya zarbalari frontdagi jangchilarimizga ham yordam bermoqda.

Bizga kelib tushayotgan takliflar ba’zan, aytish mumkinki, ekzotik xususiyatga ega va qabul qilib bo‘lmaydigan takliflar. Biz tinchlik borasidagi muloqotga doim tayyormiz, biroq faqat mavjud realliklarga asoslangan holda."