Kecha, 18-mart kuni respublikamiz bo'ylab umumxalq xayriya hashari bo'lib o'tdi. “Mahalla” fondi matbuot xizmati taqdim etgan ma’lumotlarga ko‘ra, 12 mingdan ziyod ehtiyojmand aholiga moddiy yordam ko‘rsatilgan.

Shuningdek, 3 ming 102 nafar yakka-yolg‘iz keksalar holidan xabar olingan. Buning uchun 4 milliard so‘mdan ziyod mablag‘ sarf etildi.

Bundan tashqari, 4 mingdan ziyod ehtiyojmand oilalarning uy-joylarini ta’mirlash uchun 1,5 milliard so‘mdan ziyod mablag‘ yo‘naltirilgan.

Hashar doirasida 2 million tupga yaqin manzarali va mevali daraxt ko‘chatlari o‘tqazilib, 11 ming tonnadan ziyod maishiy va sanoat chiqindilari chiqarib tashlandi. 9 mingdan ziyod qabriston, 500 dan ziyod ziyoratgohlar obodonlashtirildi.

Qayd etilishicha, hasharda jami 8 million nafardan ziyod ko‘ngillilar ishtirok etgan bo‘lsa, ularning 5 milliondan ko‘prog‘ini yoshlar tashkil etadi.