Turkiyaning Istanbul shahrida joylashgan Worldwide Lavyers Association (WOLAS) advokatlari BAAdagi sud-tergov jarayonlari shaffof o‘tgani, sud mustaqilligi va O‘zbekiston fuqarolarining huquqlariga rioya qilinganiga shubha bildirmoqda.

WOLAS BAA Oliy sudining jinoyat ishlari bo‘yicha kollegiyasidan o‘lim hukmini bekor qilib, mazkur ishni siyosiy emas, yuridik mezonlarga asoslangan holda qayta ko‘rib chiqishni so‘ragan.

Huquqshunoslar ishning maxsus sudda ko‘rilgani, shaffoflik va yetarli darajada yuridik yordam mavjud bo‘lmagani, ehtimoliy qiynoqlar orqali olingan iqrorlik, terrorizmga qarshi kurashning ramziy belgisi sifatidagi og‘ir jazo, siyosiy bosimlar va BAA–Isroil munosabatlari iliqlashuvi fonida hukm chiqarilgan bo‘lishi mumkinligiga e’tibor qaratgan.

WOLAS O‘zbekiston hukumatini fuqarolarini himoya qilishda faolroq bo‘lishga, BMT organlarini esa holatni tergov qilishga chaqirgan. Advokatlar ushbu murojaatini O‘zbekiston tashqi ishlar vazirligi, BAA adliya va tashqi ishlar vazirligi, Inson huquqlari bo‘yicha BMT Oliy komissari, Suddan tashqari yoki o‘zboshimchalik bilan qatl qilish bo‘yicha maxsus ma’ruzachi hamda Qiynoqlar bo‘yicha maxsus ma’ruzachiga rasman yuborgan.

“Bu masala O‘zbekiston Tashqi ishlar vazirligi va mamlakatimizning BAAdagi elchixonasi tomonidan doimiy diqqat markazida turibdi. Huquqiy yordam ko‘rsatish, jazoni yengillatish va vatandoshlarimiz manfaatlarini himoya qilish bo‘yicha zarur diplomatik va konsullik chora-tadbirlari ko‘rilmoqda. Bundan tashqari, tegishli huquqiy maslahatlar berish va mahalliy organlar bilan muloqot olib borish ishlari ham amalga oshirilmoqda”,  – deya munosabat bildirgan O‘zbekiston TIV matbuot kotibi Ahror Burhonov.

• Advokat
• BAA
• O‘zbekistonlik
• Turkiya