Bugun, 18-yanvar kuni shoir Yoʻlchi Roʻziyev va xonanda Yulduz Usmanova oʻrtasidagi apellyatsiya sud ishi boʻlib oʻtdi.

Unga koʻra, 2021-yil 20-sentyabr kuni fuqarolik ishlari boʻyicha Mirzo Ulugʻbek tumanlararo sudiga daʼvogar Yoʻlchi Roʻziyev javobgar Yulduz Usmanovaga nisbatan “Xasta boʻlma” qoʻshigʻining sheʼr muallifi sifatida mualliflik huquqlari buzilishiga chek qoʻyish, mualliflik huquqlari buzilganligi uchun tovon puli va maʼnaviy zarar undirish haqidagi daʼvo arizasi bilan murojaat qilgan.

29-oktyabr kuni qabul qilingan hal qiluv qarori bilan daʼvo arizasi qisman qanoatlantirilib, Yulduz Usmanovadan daʼvogar Yoʻlchi Roʻziyevga 50 000 000 soʻm maʼnaviy zarar uchun kompensatsiya, bazaviy hisoblash miqdorining 500 barobar miqdorida yetkazilgan zarar hisobiga tovon puli undirish belgilab berilgan.

Bugun, 18-yanvar kuni Toshkent shahar sudi fuqarolik ishlari boʻyicha sudlov hayʼati apellyatsiya shikoyatini koʻrib chiqish boʻyicha sud jarayonini yakunlanganini eʼlon qildi. Unga koʻra, daʼvogar Yoʻlchi Roʻziyevning javobgar Yulduz Usmanovaga nisbatan mualliflik huquqlari buzilishiga chek qoʻyish, mualliflik huquqlari buzilganligi uchun tovon puli va maʼnaviy zarar undirish haqidagi daʼvo arizasi yuzasidan chiqarilgan fuqarolik ishlari boʻyicha Mirzo Ulugʻbek tumanlararo sudining 2021-yil 29-oktyabrdagi hal qiluv qarori oʻzgarishsiz qoldirilgan. Xonandaning apellyatsiya shikoyati esa qanoatlantirilmasdan qoldirilgan.

• Shou-biznes
• mashhurlar