AQSh milliy aeronavtika va fazo maʼmuriyati (NASA) rahbari Bill Nelson Xitoy kosmonavtlari Oygacha yetib borishi va mamlakat hukumati Yerning yoʻldoshini oʻz hududi deb eʼlon qilishidan xavotirda ekanligini aytdi.

Nelsonning taʼkidlashicha, ayni vaqtda “koinotni tadqiq qilish boʻyicha yangi poyga” boshlangan va unda Xitoy hukumati ham faol ishtirok etyapti.

“Xitoy Oygacha yetib borishi va “Bu yer bizga tegishli, undan nari turing” deb aytishidan jiddiy tashvishlanishimiz kerak”, deydi Nelson. NASA rahbarining aytishicha, bunday fikrlashiga Xitoyning “harbiy kosmik dasturi”ga ega ekanligi sabab boʻlmoqda.

Bill Nelson shuningdek, xitoylik kosmonavtlarga “boshqalarga tegishli boʻlgan yoʻldoshlarni ishdan chiqarish ham oʻrgatilishi”ni taxmin qilyapti.

Eslatib oʻtamiz, bundan bir muddat avval Xitoy Oyga oʻz taykonavtlarini 2030-yilga qadar yuborish niyatida ekanligi maʼlum boʻlgandi. Taykonavtlar katta ehtimol bilan Oyning Janubiy qutbiga borib qoʻnishadi, bu yerda ilmiy-tadqiqot stansiyasi va baza ishga tushiriladi.

Oyning Janubiy qutbi yetarlicha yorugʻ va muz zaxiralariga ega ekanligi uchun ham qoʻnish joyi sifatida tanlab olingan.

• Koinot
• NASA
• Xitoy
• ilm-fan
• tadqiqot