Xitoyning “Zhurong” roveri Marsdan suv molekulalarini topdi. Olimlar buni marsoxod tomonidan Yerga yetkazib berilgan maʼlumotlarni tahlil qilish orqali aniqlaganlar.

Oʻtgan yilning may oyida Mars sayyorasiga muvaffaqiyatli qoʻngan “Zhurong” roveri “Utopiya tekisligi” deb nomlanuvchi hududni tadqiq etmoqda. Mazkur hudud geologik jihatdan yosh boʻlib, Marsning Amazoniya davrida shakllangan.

Olimlarning taxminlariga koʻra, Mars qadimda suv havzalari bilan qoplangan boʻlgan. Bundan 3 milliard yil avval geologik davr oʻzgargan va sayyora suv havzalaridan ayrilgan. Bugungi kunda Qizil sayyoradagi suv zaxiralari muz koʻrinishida saqlanadi.

Xitoylik olimlar Marsdagi suv havzalarining qurishi jarayoni taxmin qilinganidan keyinroq sodir boʻlganini aytib oʻtganlar. “Zhurong” marsoxodi “Utopiya tekisligi”dan tarkibida suv saqlanuvchi gidrativ minerallarni topgan. Ularning yoshi 700 million yilga teng.

Marsoxod tomonidan topilgan minerallar tarkibida suv molekulalarining mavjud ekanligi tasdiqlangan. Minerallar topilgan hudud tuprogʻi qattiq qobiqqa ega, olimlarning aytishlaricha, qobiq katta ehtimol bilan muzliklarning erishi natijasida paydo boʻlgan.

• Koinot
• Mars
• ilm-fan
• tadqiqot