Kelib chiqishi ukrainalik boʻlgan va soʻnggi yillar ichida Rossiyada istiqomat qilgan xonanda Vera Brejneva Rossiyaning Ukrainadagi harbiy harakatlari boshlanganidan keyin mamlakatni tark etgandi. Muxlislar uning ayni vaqtda qayerda ekanligini bila olishmagan. Ijodkor kuni kecha ayni vaqtda Polshada ekani va ukrainalik qochqinlarga koʻngilli sifatida yordam koʻrsatish bilan band ekanligini maʼlum qildi.

Xonanda Instagram sahifasi orqali qochqinlar uchun gumanitar yordam taqsimlanuvchi ombor ichida tushgan suratini eʼlon qilgan. Ijodkorga kenja qizi hamrohlik qilmoqda.

“Ertaga tongda bizga yaqin joylashgan punktda boʻlaman. Bu safar qizimni ham oʻzim bilan birga olib ketaman. Shunday ekan siz ham oʻz shaharlaringizga bizga qoʻshiling”, deb yozdi Brejneva.

Xonanda fevral oyi oxirlarida oʻz obunachilariga farzandlari bilan xavfsiz joyda ekani, ammo turmush oʻrtogʻi (Konstantin Meladze, — tahr.), onasi, singlisining oila aʼzolari Kiyev yertoʻlalarida hujumdan himoyalanayotganini aytib oʻtgandi.

Vera Brejneva bunga qadar oʻzini ukrainalik xonanda deb hisoblamasligini aytgan boʻlsa-da, Rossiyaning Ukrainadagi harbiy harakatlari boshlanganidan keyin hukumatni keskin qoralab chiqqan. Bu esa xonandaning rossiyalik obunachilari tomonidan muhokama va tanqidlarga sabab boʻlgan.

Vera Brejneva kelgusidagi rejalari haqida gapirganicha yoʻq. Shuni taʼkidlash kerakki, Rossiyaning Ukrainadagi harbiy operatsiyasini boshlanganidan keyin har ikki mamlakatdan boʻlgan taniqli yulduzlar birin-ketin xorijga chiqib ketishni boshlagan. Muxlislar endilikda ularning ortga qaytmasliklarini taxmin qilishmoqda.

• San’at
• Shou-biznes
• mashhurlar