Joriy yilning 26-29-aprel kunlari Xorazmda I Xalqaro “Lazgi” raqs festivali bo‘lib o‘tdi. Festivalga 30dan oshiq davlatlardan 200ga yaqin sanʼatkorlar tashrif buyurishgan.

Mazkur tadbir hamda uning doirasida xalqaro ilmiy-amaliy konferensiyani o‘tkazish Prezidentning 2020-yil 29-sentyabrdagi qaroriga binoan tashkil qilinib, 2022-yildan boshlab har ikki yilda bir marotaba 25-30-aprel kunlari Xiva shahrida tashkillashtirilishi belgilab qo‘yilgan.

Xabardor.uz ushbu festivalning respublika byudjetiga qanchaga tushgani bilan qiziqdi.

Yuqoridagi Prezident qaroriga muvofiq, tadbirni o‘tkazishda moliyaviy xarajatlarning 70 foizi respublika byudjetidan Madaniyat vazirligiga har yili ajratiladigan mablag‘lar hisobiga hamda qolgan 30 foizi Xorazm viloyatining mahalliy byudjeti, homiylik xayriyalari hamda qonun hujjatlarida taqiqlanmagan boshqa manbalar hisobiga qoplanadi.

Xo‘sh, viloyat hokimligi hissasiga to‘g‘ri kelayotgan ulush qanchani tashkil qiladi?

Viloyat hokimligining 2022-yil 24-apreldagi qarori bilan hokimlikning mahalliy byudjeti qo‘shimcha manbalari hisobidan “festivalga tayyorgarlik ko‘rish va uni yuqori saviyada o‘tkazish bilan bog‘liq xarajatlarni qoplash uchun” Xorazm viloyati madaniyat boshqarmasiga 4 mlrd 847,4 mln so‘m mablag‘ ajratilgan.

Shuningdek, bir kun o‘tib, yaʼni 25-aprel kuni viloyat hokimi F.Ermanov yuqoridagi maqsadlar uchun “viloyat mahalliy byudjetining 2022-yil 1-yanvar holatiga erkin qoldig‘i hisobidan” 2 mlrd so‘m ajratish haqidagi 120-12-0-F/22 sonli qarorni imzolagan.

Prezident qarorida ushbu tadbirni moliyalashtirish manbalari sifatida sanab o‘tilgan “homiylik xayriyalari hamda qonun hujjatlarida taqiqlanmagan boshqa manbalar” haqida maʼlumotlar hech qayerda ochiqlanmagan va buni rasmiylashtirishning ham imkoni yo‘q.

Mazkur qarorda, shuningdek, ayrim chiqimlar ham sanalib o‘tgan bo‘lib, jumladan:

– Tanlov ishtirokchilarining chiqishlarini baholash uchun tuziladigan xalqaro hayʼat tuziladi va aʼzolar quyidagi tartibda rag‘batlantiriladi:

a) raisga – 2 ming AQSh dollari;

b) hayʼat aʼzolarining har biriga (6 kishi) – 1000 (bir ming) AQSh dollari miqdorida gonorar puli to‘lab beriladi.

Shuningdek, anjuman doirasida o‘tkaziladigan tanlov g‘oliblari quyidagi miqdorda pul mukofotlari bilan taqdirlanadi:

“Gran-Pri” – 7 000 AQSh dollari;

1-o‘rin – quyidagi nominatsiyalar bo‘yicha:

“Eng yaxshi yakkaxon raqs ijrochisi” – 5 000 AQSh dollari;

“Eng yaxshi raqs jamoasi” – 5 000 AQSh dollari;

“Eng yaxshi sahnalashtirilgan raqs” – 5 000 AQSh dollari.

2-o‘rin – quyidagi nominatsiyalar bo‘yicha:

“Eng yaxshi yakkaxon raqs ijrochisi” – 3 000 AQSh dollari;

“Eng yaxshi raqs jamoasi” – 3 000 AQSh dollari;

“Eng yaxshi sahnalashtirilgan raqs” – 3 000 AQSh dollari.

3-o‘rin – quyidagi nominatsiyalar bo‘yicha:

“Eng yaxshi yakkaxon raqs ijrochisi” – 2 000 AQSh dollari;

“Eng yaxshi raqs jamoasi” – 2 000 AQSh dollari;

“Eng yaxshi sahnalashtirilgan raqs” – 2 000 AQSh dollari.

Bundan tashqari, tashkilotchilar tomonidan har bir qo‘shimcha nominatsiya uchun 500 AQSh dollari miqdorida pul mukofotlari ajratilishi mumkin.

Demak, xomaki hisob kitoblarga ko‘ra, 6 mlrd 847,4 mln so‘mni viloyat hokimligi ajratishi kerak bo‘lgan mablag‘ (30 foiz) deb oladigan bo‘lsak, jami taxminan 22 mlrd 825 mln so‘m sarflangan bo‘ladi.

Bunda yuqorida aytilganidek, homiylik va qonun bilan taqiqlangan boshqa mablag‘larni aniqlashtirishning imkoni yo‘q.

• Davlat byudjeti
• Festival
• Lazgi
• Xorazm
• qiziqarli