Bog‘ot tumanida tadbirkordan 45 000 AQSh dollari undirmoqchi bo‘lgan firibgarlar ushlandi. Bu haqda Bosh prokuratura huzuridagi Departament matbuot xizmati ma’lum qildi.

Ma’lum qilinishicha, Departament hamda DXXning Xorazm viloyati boshqarmalari tomonidan tadbirkorlik sub’yektlarining huquqlarini himoya qilish yuzasidan tezkor tadbir o‘tkazilgan.

Tadbirda, fuqarolar S.I. va R.D.lar oldindan til biriktirib, “B.Q.” MChJ rahbarining yuk avtotransport vositalarini xarid qilish uchun 10 mlrd so‘m kredit olish istagi borligidan foydalanib, ushbu kredit mablag‘ini bank muassasasida ishlovchi tanishlari orqali ajratilishida yordam berishlari evaziga 45 000 AQSh dollari talab qilgani aniqlangan va shundan 15 000 AQSh dollarini olgan vaqtida ashyoviy dalillar bilan ushlanganlar.

Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.

• Jinoyat
• Xorazm