Toshkent viloyati Yangiyo‘l shahrida fuqaro o‘z itini go‘shti uchun o‘ldirdi. Bu haqda “Mehr va oqibat” hayvonlarni himoya qilish jamiyati xabar bermoqda.

Jamiyatning Call-markaziga yangiyo‘llik fuqaro A.A. murojaat qilgan. U tanishidan fuqaro o‘zi itini o‘ldirayotgani aks etgan videolarni olgan. “Mehr va oqibat” IIVga rasmiy murojaat bilan chiqib, hayvonlarga nisbatan shafqatsizlik qilgan shaxsni aniqlash va uni qonun doirasida jazolashni so‘ragan.

“Ekolog” jamoat birlashmasi tezkor o‘rganish ishlari olib borilganida ushbu shaxs 30 yoshli M.A. ekanligi aniqlangan. U Yangiyo‘l shahrida istiqomat qiladi. Mavjud ma’lumotlarga ko‘ra, fuqaro bunday harakatlarni doimiy ravishda amalga oshirib kelgan.

“Ushbu shaxs o‘zining xususiy uyida muntazam ravishda itlarni, jumladan, o‘zining itlarini ham, shafqatsizlarcha o‘ldirib, go‘shtini iste’mol qilib kelgan — ishongan, yonida yashagan va xiyonatni kutmagan jonivorlarni. Bundan tashqari, u bu itlardan tug‘ilgan kuchukchalarni ham so‘ygan”, – deyiladi “Ekolog” jamoat birlashmasi xabarida.

Voqea joyiga volontyorlar va hayvonlarni himoya qiluvchilar mahalla nozirlari bilan birga yetib kelganida, uyda uning onasi va singlisi ham bo‘lgan. Ona o‘g‘lining bunday ishni qilishi mumkinligiga ishonmasligini aytgan. Hatto unga videoyozuvlar ko‘rsatilgandan keyin ham inkor qilgan.

“Ekolog” jamoat birlashmasi ham ushbu shaxsga nisbatan qonuniy chora ko‘rilishini so‘ragan.

Ma’lumot uchun, ma’muriy javobgarlik to‘g‘risidagi kodeksning 111-moddasiga ko‘ra, hayvonlarga nisbatan shafqatsiz munosabatda bo‘lish, ya’ni ularni g‘arazli yoki boshqa past niyatlarda qiynoqqa solish yoki ularga azob berish, BHMning 3 baravaridan 5 baravarigacha (1 million 236 ming so‘mdan 2 million 60 ming so‘mgacha) miqdorda jarima solishga sabab bo‘lishi belgilangan.

Jinoyat kodeksining 202-1-moddasiga ko‘ra, hayvonlarga nisbatan shafqatsiz munosabatda bo‘lish ma’muriy javobgarlikdan keyin sodir etilgan bo‘lsa, BHMning 50 baravarigacha (20 million 600 ming so‘mgacha) jarima yoki 6 oygacha ozodlikdan mahrum qilish bilan jazolanadi.

• Ekologiya
• Hayvon
• Toshkent