“Qo‘yliq – Quruvchilar” yerusti metro yo‘lining 5 ta bekati qurib bitkazildi. Bu haqda “O‘zA” axborot agentligi xabar bermoqda.

2020-yilning avgust oyida Toshkent yerusti metrosining 1-bosqichi, dekabr oyida esa Sergeli yo‘nalishi ochilgandi.

Hozirda yerusti halqa metro yo‘lining II bosqichi – 8,5 km uzunlikdagi 5 ta bekatni o‘z ichiga olgan “Qo‘yliq – Quruvchilar” qismi qurib bitkazilgan. Loyihaning 3,8 km uzunlikdagi 2 ta bekatni o‘z ichiga oluvchi “Quruvchilar – Qipchoq” qismida qurilish ishlari olib borilmoqda.

Kecha, 24-mart kuni mazkur yo‘nalishlar bo‘ylab poyezdlar texnik harakati sinovdan o‘tkazildi.

Texnik sinovlardan so‘ng mazkur yo‘nalishda yo‘lovchi tashuvlarining boshlanishi natijasida bir kunda 40 mingga yaqin yo‘lovchiga xizmat ko‘rsatiladi. Yo‘nalishlar orasidagi qatnovlar esa 15 daqiqani tashkil etadi.