O‘zbekistonda 2021-yil 1-iyundan boshlab mahalliy aviaqatnovlarni subsidiyalash yo‘lga qo‘yilgan.

Vazirlar Mahkamasining joriy yil 7-maydagi “Mintaqaviy aviatashuvlarni va ichki turizmni yanada takomillashtirish bo‘yicha qo‘shimcha chora-tadbirlar to‘g‘risida”gi qaroriga asosan, mahalliy aviaqatnovlarni amalga oshiruvchi barcha rezident aviakompaniyalarga subsidiya ajratiladi va bu 2026-yil 1-yanvargacha davom etadi.

Qarorga ko‘ra, aviachiptalar narxlari hamda subsidiyalanadigan aviaqatnov yo‘nalishlarini subsidiyalash miqdorini belgilash bo‘yicha maxsus komissiya tarkibi qayta tasdiqlandi.

Mahalliy yo‘nalishlardagi aviaqatnovlarga “Uzbekistan Airways” AJ uchun belgilangan maxsus tariflar va subsidiya miqdorlari barcha rezident aviakompaniyalarga tatbiq etishga rozilik berildi.

Transport vazirligining ma’lum qilishicha, shu munosabat bilan barcha rezident aviakompaniyalar Maxsus komissiya tomonidan belgilangan mahalliy yo‘nalishlar va tariflar doirasida aviachipta sotishni yo‘lga qo‘yish hamda har oy yakuni bo‘yicha vazirlikning 2021-yil 14-oktyabrdagi 188-son buyrug‘i bilan tasdiqlangan jadval shaklida Transport vazirligiga subsidiyalash uchun arizalar kiritiladi.

• Aviaqatnov
• aviakompaniya
• subsidiya