Kecha, 3-noyabr kuni Investitsiyalar va tashqi savdo vazirligi tomonidan tashkil etilgan “O‘zbekiston – Yevropa Ittifoqi” taraqqiyot hamkorligi bo‘yicha kichik qo‘mitasining 4-majlisi bo‘lib o‘tdi.

Majlis investitsiyalar va tashqi savdo vaziri o‘rinbosari Shuhrat Vafoyev va Yevropa komissiyasi departamenti rahbari Sara Rinaldi hamraisligida o‘tdi. 

2021–2027-yillarga mo‘ljallangan yangi dastur doirasida Yevrokomissiya bilan ikki tomonlama moliyaviy va texnik hamkorlikni yanada rivojlantirish istiqbollari va yo‘nalishlari masalasi yig‘ilish kun tartibidagi asosiy masalalardan biri bo‘ldi.

Xususan, tomonlar qishloq xo‘jaligi va “yashil o‘sish”ni qo‘llab-quvvatlash, boshqaruv va raqamlashtirish samaradorligini oshirish, jumladan, sud-huquq va transport-logistika tizimlari, investisiya muhitini yaxshilash hamda Orolbo‘yining ijtimoiy-iqtisodiy rivojlanishi masalalarini muhokama qildilar.

Shuningdek, Yevropa tomoni Yevropa Komissiyasining O‘zbekiston uchun 2021–2024-yillarga mo‘ljallangan 83 million yevro miqdorida maqsadli grantlar ajratish, shuningdek, YeIga a’zo davlatlar bilan birgalikda “Team Europe” tashabbusi doirasida Orol dengizi zonasini rivojlantirish bo‘yicha moliyaviy va texnik hamkorlikni kengaytirish niyatida ekanligini ma’lum qildi.

• Grant
• Investitsiya
• Yevrokomissiya