28-iyul kuni Amerika Qoʻshma Shtatlari Prezidenti Jo Bayden va Xitoy rahbari Si Szinpin oʻrtasida telefon suhbati boʻlib oʻtdi. Ularning suhbati ikki soatdan koʻproq davom etgan. Bu haqda Oq uy matbuot xizmati xabar berdi.
“Bayden Si Szinpin bilan telefon suhbatini yakunladi, ular 2 soat 17 daqiqa suhbatlashdi”, – deyiladi xabarda.
Bu ikki mamlakat yetakchilarining beshinchi va mart oyidan buyon birinchi suhbati hisoblanadi.
Xitoy va AQSH oʻrtasidagi keskinlik bir necha yillardan beri davom etmoqda. Donald Tramp prezidentligi davrida ham Vashington Pekinga, jumladan uygʻurlar va Tayvan muammolari yuzasidan bosimni kuchaytirgandi.
Soʻnggi haftalarda AQSH vakillar palatasi spikeri Nensi Pelosining tez orada Tayvanga borishi haqidagi rejalari sababli Xitoy va Qoʻshma Shtatlar orasidagi keskinlik kuchaydi. Rasmiy Pekin bu tashrifni bekor qilishni talab etmoqda.
Agar Nensi Pelosi Tayvanga borsa, u 25 yil ichida Tayvanga tashrif buyurgan AQSH Kongressi palatasining birinchi spikeri boʻladi.
Oq uy Milliy xavfsizlik kengashining strategik kommunikatsiyalar boʻyicha direktori Jon Kirbi avvalgi kungi bayonotida yetakchilar suhbat chogʻida Xitoyning Tayvan va Hind-Tinch okeani mintaqasiga nisbatan “tajovuzkor pozitsiyasi”, iqtisodiy munosabatlardagi keskinlik va Xitoyning 24-fevraldan beri davom etayotgan Rossiya-Ukraina urushiga munosabati muhokama qilinishini aytgandi.
Boshqa tomondan, Xitoy rahbari Si Szinpin suhbat chogʻida Tayvandagi holatga tashqi kuchlarning aralashuvini keskin qoralagan.
“Biz ayirmachilik va “Tayvan mustaqilligi”, shuningdek, tashqi kuchlarning aralashuviga qatʼiy qarshimiz. Xalq irodasiga qarshi bora olmaysiz, olov bilan oʻynagan oʻzini yoqib yuboradi”, – degan Si Szinpin.
Xitoy matbuotida oʻrin olgan xabarlarga koʻra, Si Szinpin Xitoy Tayvan mustaqilligi uchun harakatlarga va har qanday tashqi aralashuvga qarshi turishini bildirdi.
U Qoʻshma Shtatlarni “yagona Xitoy” tamoyiliga va AQSh-Xitoy diplomatik munosabatlarining asosini tashkil etuvchi Uch Qoʻshma deklaratsiyadagi majburiyatlariga soʻzda ham, amalda ham toʻla amal qilishga chaqirdi.
Qayd etilishicha, ikki davlat rahbarlarining suhbati samimiy va puxta oʻtgan, tomonlar aloqalarni davom ettirishga kelishib olishgan.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!