1,2 million abituriyent 8-avgust tongini oʻzgacha hayajon bilan qarshiladi. Sababi, bugundan boshlab oliy taʼlim muassalasariga kirish imtihonlari start oldi.

Xabardor.uz jamoasi DTM test sinovining birinchi kunida test jarayoni bilan qiziqdi va Toshkent shahrida joylashgan “Paxtakor” stadioniga bordi.

Oʻyingoh 4 ta sektorga boʻlingan boʻlib, bu yerda 2 280 nafar abituriyent uchun joy hozirlangan.

Test jarayonlarida turli xil sabablarga koʻra, kech qolib kelgan abituriyentlarni ham eshik oldida koʻrish mumkin. Sport maydoni tashqarisida abituriyentlarning yaqinlari uchun yaratilgan sharoitlarni esa qoniqarli deb boʻlmaydi.

Test jarayonlarini kuzatish maqsadida DTM direktori oʻrinbosari Sardor Rajabovning oʻzi ham shu yerda edi.

“Bugun hech qanday ortiqcha buyumlar va oʻringa oʻrin kirish holatlari kuzatilmadi. Kuning ikkinchi yarmida ham test sinovlari oʻtkazilgandan soʻng, barcha maʼlumotlar shtabga yigʻiladi”, – dedi Sardor Rajabov.

Lekin ertalabki test sinovidan so'ng ijtimoiy tarmoqlarda “archa bayram” ruknida maʼlumotlar tarqaldi. Mazkur xabarlarda DTM tomonidan berilgan savol varaqalarining rasmini koʻrish mumkin.

Holat yuzasidan Davlat test markazi rasmiy munosabat bildirdi.

Maʼlum boʻlishicha, suratda kimyo va matematika fanlaridan test topshiriqlari aks etgan, lekin ularning raqami koʻrinmagan.

Savol varaqasi 8-avgust kuni Fargʻona viloyatida oʻtkazilgan test sinovlariga taalluqli boʻlib, mazkur abituriyent imtihon vaqtida telefondan foydalanayotgani aniqlanib, dalolatnoma asosida test sinovlaridan chetlashtirilgan.

Mavzuga doir: Test sinovlari paytida nazoratchilar qancha haq olishadi, test vaqtida tobi qochib qolgan abituriyentlar nima qiladi yoxud DTM test sinovlarini oʻtkazishga tayyormi? 

“Marhamat, sizlar turli rasmlarni ijtimoiy tarmoqda eʼlon qilishda davom etavering, biz esa barchasi nazoratda ekanini koʻrsatib beramiz hamda jarayonlar shaffof va adolatli oʻtishini taʼminlaymiz”, – deyiladi markaz bayonotida.

Eslatib oʻtamiz, test sinovlari yakunlangandan soʻng 7 kun mobaynida imtihon natijalari tekshirib chiqiladi va abituriyentning talabalikka tavsiya etilgani yoki tavsiya etilmagani maʼlum boʻladi.

• DTM