Dunyo miqyosida, shu jumladan O‘zbekistonda koronavirus pandemiyasi tarqalayotgani munosabati bilan tibbiy asboblarga ehtiyoj ortib bormoqda. Yaponiyada istiqomat qilayotgan o‘zbekistonliklar ushbu murakkab vaziyatda O‘zbekiston hukumatining COVID-19ga qarshi kurashish bo‘yicha sa’y-harakatlarini qo‘llab-quvvatlashga o‘z hissasini qo‘shishga qaror qildi, deb xabar qilmoqda “Dunyo” AA.

Xususan, ular "Paramount Beds" kompaniyasining ko‘p funksiyali krovatlari, shuningdek, tibbiy niqoblar, qo‘lqoplar va bosh kiyimlardan iborat insonparvarlik yordami shakllantirdi.

Ushbu insonparvarlik yordami O‘zbekistonning Yaponiyadagi elchixonasi ko‘magida mamlakat tibbiy muassasalariga yetkazish uchun Toshkentga jo‘natildi.

Ta’kidlanishicha, Yaponiyaning "Paramount Beds" kompaniyasi krovatlari tibbiyot sohasidagi eng ilg‘or jihozlardan hisoblanadi. Bu komatoz va o‘ta og‘ir bemorlarni davolash jarayonida zarur asbob-uskunalar bo‘lib, tibbiyot xodimlariga masofadan boshqarish pulti yordamida bemorning har bir tana qismida sodir bo‘layotgan o‘zgarishlarni nazorat qilish imkonini beradi.