Ijtimoiy tarmoqlarda Samarqand viloyatining Urgut tumanidagi 2-umumta’lim maktabida direktor o‘rinbosari tomonidan o‘quvchiga nisbatan zo‘ravonlik qilingani haqida xabarlar tarqaldi.

Samarqand viloyati Maktabgacha va maktab ta’limi boshqarmasi axborot xizmatining ma’lum qilishicha, mazkur holat bugun, 2-aprel kuni darsdan so‘ng maktabning ma’naviy-ma’rifiy ishlar bo‘yicha direktor o‘rinbosari hamda 9-sinf o‘quvchisi o‘rtasida sodir bo‘lgan. Ayni vaqtda holat huquqni muhofaza qiluvchi organlar tomonidan o‘rganilmoqda.

“Samarqand viloyati Maktabgacha va maktab ta’limi boshqarmasi o‘quvchilarga nisbatan har qanday qo‘pol munosabatni keskin qoralaydi”, – deyiladi xabarda.

Mazkur holat yuzasidan boshqarma tomonidan ishchi guruh tuzilib, o‘rganish natijalari bo‘yicha qo‘shimcha ma’lumot taqdim etiladi.

• Maktab
• Mushtlashuv
• Samarqand