Qo‘ldan sotib olingan “iPhone” yangi egasiga bir qancha noxush syurprizlarni tayyorlab turgan bo‘lishi mumkin. Undagi bir qator funksiyalar ishdan chiqqan, ekrani almashgan va eng yomoni, o‘g‘irlab, sotilayotgan hollar ham uchrab turadi. Bu kabi noxush holatlar boshingizga tushmasligi uchun Sizga tutilgan “iPhone” tanlash sirlarini o‘rgatamiz.
 
Sim-karta solinadigan joyi sinmagan “iPhone”ni tanlang
“iPhone” xarid qilyapsiz. Ahvoli juda yaxshi, korpus va ekrani zararlanmagan, barcha funksiyasi ishlayapti. Faqatgina sim-karta solinadigan joyi singan. Mazkur e’lonni o‘qishingiz bilan bu variant boshqalariga nisbatan yaxshiroq tuyuladi. Xuddiki, singan joyni ta'mirlatib, ishlatib ketadigandek. 
Shoshmang! Bu - firibgarlar tuzog‘i. Siz  telefonni yoqqan zahoti o‘z manzil va tilingizni kiritasiz. Ekranda "sim-kartani joylashtiring", degan yozuv paydo bo‘ladi. Biroq ta'mirlashdan so‘ng mobil telefonni faollashtirish mumkin bo‘lmay qoladi. Chunki “Apple” “iPhone”ning ID-manzili va parolini so‘raydi. Aslida esa qurilma o‘g‘irlangan va o‘g‘rilar uni sotayotganda yangi egasi tekshirib ko‘ra olmasligi uchun sim-karta tiqadigan joyini atayin sindirishadi. Sabab oddiy. Telefonning avvalgi egasi qurilma o‘g‘irlangan zahoti uni "iCloud" orqali qulflab qo‘yadi. 
Shu sababli, “iPhone”ga pul to‘lashdan avval uni sim-karta bilan faollashtirib ko‘ring. Agar ekranda faollashish amalga oshmagani haqida xabar paydo bo‘lsa, bu qurilmani xarid qilmagan ma’qul. 
 
Gadjetni ko‘zdan kechiring
“iPhone” sotib olayotganda chiroqni yoqib, quvvat oladigan joyini tekshiring. U yerda biror-bir tirnalish yoki shikastlanish alomati bo‘lmasligi kerak. Aks holat qurilmaning ochilganligini anglatadi. Shuningdek, quvvatlovlovchi manbalarga ham e’tibor bering. Ishlaydigan qurilmaning simi ezilgan va qisilgan bo‘lmaydi. Yana “Home” tugmasini ham nazardan qochirmang, u “iPhone”ning rangidan farq qilmasligi kerak. Shu tugmadagi har qanday o‘zgarish shubhali bo‘ladi. Unda juda ko‘p zaruriy funksiyalar, xususan, “Apple Pay” ishlamasligi mumkin.

Ekranga ham alohida ahamiyat bering
Almashtirilgan ekran korpusdan chiqib turadi, yaxshi yopishtirilmagan, rasmlar xira, bosilganda sensor darhol reaksiya bermaydi. Bu vaziyatda xariddan voz kechgan ma'qul. Original bo‘lmagan ekran batareyasi tez tugaydi, yerga yengil urilganda yoki harorat tushib ketganda yorilib ketishi mumkin. Shuningdek, ko‘pchilik original bo‘lmagan qurilmada “True Tone” texnologiyasi ishlamaydi. Ya’ni “iPhone” yorug‘likka moslashmaydi va ishlatganda ko‘zlar yorug‘likka ko‘nikolmay, charchaydi. Buni “Sozlamalar — Ekran va yorug‘lik” buyruqlari orqali tekshirib olishingiz mumkin. 
Telefon batareyasini ham “Sozlamalar – Akkumulyator - Akkumulyator holati - Maksimal imkoniyatlar” buyruqlari ketma-ketligini terib, tekshirib ko‘ring.

Qurilmaning IMEI raqamini tekshiring
Har bir “iPhone”da 15 raqamdan iborat IMEI-identifikatori bo‘ladi. U, odatda, sim-karta solinadigan joy, telefon qutisida aks etgan bo‘ladi va “Sozlamalar - Asosiylari — Shu qurilma haqida” buyruqlari ketma-ketligidan keyin ham chiqib keladi. Bu uchala raqam bir-biriga mos tushishi kerak. 
Shuningdek, model raqamini ham tekshirib ko‘rish lozim. Uni menyudagi “Qurilma haqida” buyrug‘idan topishingiz mumkin. Birinchi harf “iPhone”ning yig‘ilgan joyi, M – chakana savdo uchun yangiligi, F – qayta ishlab chiqarilgani, N – smartfon garov shartnomasiga binoan o‘zgartirilgani, P esa – individual shaxs nomi o‘yib yozilgan “iPhone” ekanligini anglatadi.   
 
Qutisini sinchiklab tekshiring
“Apple” kompaniyasi nafaqat qurilmaning o‘zi, balki uning qutisiga ham alohida e’tibor bergan. Shunday ekan, qutida yelim va o‘chadigan bo‘yoq izlari bo‘lmasligi kerak. Haqiqiy qutida o‘chmaydigan poligrafiya yozuvi aks etadi, xolos.
 
Qurilmaning tarixi bilan qiziqing
“iPhone” xarid qilayotganda uning buzilgan-buzilmagani, qaysi servis markazida ta'mirlanganini sinchiklab surishtiring. Agar telefon rasmiy servis markazda ta’mirlangan bo‘lsa, xavotirlanishga hojat yo‘q, biroq duch kelgan ustaga tuzattirilganini sezsangiz, yaxshisi bu xariddan voz keching.

 “iCloud”dan telefonni uzib qo‘yishni unutmang
Buni “iCloud”da "Sozlamalar – Mening hisobim - Chiqish" menyusi orqali amalga oshirishingiz mumkin. Faqat bu o‘rinda qurilmaning avvalgi egasi paroli ham kiritiladi. Shu buyruq bajarilmasa, qurilma bloklanib, barcha fotosurat va yozishmalarga kirish huquqidan mahrum bo‘lishingiz mumkin.